05/07/11

Cena de ancerramiento de l curso de mirandés an Lisboua




Çque l anho scolar ampeçou, alhá íbamos nós todas las segundas a las uito i meia de la nuite até a las dieç, habie bezes que passaba... Las reglas nun éran bien las de l menistéro de l’eiducaçon, nun se márcan faltas, cada un bai quando pude, mas íbamos cumprindo cun la nuossa oubrigaçon: daprender a falar i a screbir la lhéngua mirandesa i tamien daprender un pouquito de la história de l pobo de fala mirandesa. Mas habie tamien la jolda, quaijeque l mais amportante...

Las tierras de nacénça de ls alunos de la classe éran las seguintes: Lisboua, Leirie, Alanteijo, Macedo de Cabalheiros i tamien de l Praino Mirandés. Las acupaçones de cada pessona tamien éran bárias: atibos, reformados, zampregados, porsores, ambestigadores i tamien "solo" l grande trabalho - duonha de casa, cun ninos.

Mas l mais anteressante: tubimos l perbileijo de sermos "padrinos/madrinas" de dous ninos que nacíran durante l anho de ties de la classe: Tomás i Mariana, parabínes a sous pais. Esto ye solo para berdes: daprender mirandés até cuntribui para que la populaçon pertuesa creça!
Todos ls anhos, cumo ye de regla, la scuola acaba i, cun classes aplicadas cumo estas, bien merecemos ua merenda i diplomas. La merenda staba treminada pa la segunda die 27 na mesma sala adonde tubimos las classes. Apuis de todo treminado, un mail:

"Ya sabemos que la próssima classe bai ser la redadeira gostábamos de fazer ua merendica. Nós nun cunseguimos ir por causa de ls hourários de Mariana, mas teniemos muito gusto de puder partecipar.
Assi, pensamos que la merenda podie ser an nuossa casa (acerca l spital de la Lhuç de Carnide) an beç de ser ne l lhugar de siempre. Para nós serie mui buono.
Assi, todo mundo tenerie la ouportunidade de conhecer a Mariana i la nuossa casa que ye ua casa eiquelógica.
Abraço,
Mariana, Nuno i Patrícia."


Tomás tamien fui alhá a amostrar-se para que toda la classe l conhecisse cun sue mai, Emmanuelle, de la Speciosa, anque nun tubira quedado pa la merenda puis tenie outro cumpermisso.

La merenda corriu mui bien, cun muito bolhos i cousas buonas, até alheiras tubímos.
Houbo la antrega de ls ditados, puis tamien faziemos ditados. You nun sou capaç de bos dezir an palabras la grande alegrie que fui al recebir ls ditados i ls certeficados de frequéncia, passado puls porsores i la Associaçon de Lhéngua Mirandesa. Mas solo gustarie que bíssades, quando Fracisco Domingues, porsor cun Amadeu Ferreira, antregou l ditado a Fernanda, que ye de Picuote, als salticos, parecie ua nina de dieç anhos. "Béian alhá, ora béian, solo tengo dous erros, carai...(i cuntinaba a salticos), nunca pensei que fura capaç, solo cun un anho de classe, stou tan cuntenta..." i mais salticos.

You nun mamei la lhéngua, daprendi-la. Pertual antes de lo ser yá tenie esta fala i ye ua tristeza mui grande que las anstituiçones repunsables nun fágan un çfuorço, solo mais un cachico, para ancentibar ls falantes.

L retrato de la cena eiqui queda, tal cumo l nome de ls alunos que alhá stan: Patrícia Deus Martins, Nuno Domingues, Firmino Bernardo, Nuno Neves, Amália Andrade, Fernanda Domingues, António Cangueiro, Bina Cangueiro, Amadeu Ferreira (porsor), Francisco Domingues (porsor), Jandira Ferreira, Irene Domingues, Cristina Cardona.

António Cangueiro

11 comentários:

Unknown disse...
Este comentário foi removido pelo autor.
Unknown disse...

Pus ye Antonho,
Ser porsor assi nun custa nada, l que custa, ye tols dies splicar als falantes que la lhéngua yá nun ye solo esso. Hai que la falar i l'ansinar als nuobos.

...daprender a falar i a screbir la lhéngua mirandesa i tamien daprender un pouquito de la história de l pobo de fala mirandesa. Mas habie tamien la jolda, quaijeque l mais amportante...
La merenda corriu mui bien, cun muito bolhos i cousas buonas, até alheiras tubímos...

Todo ye amportante, mas nun quergas agora que por andar dous ou trés ratos a scuola, se passe a ser doutor de la lhéngua mirandesa. Ye politica!!!

Ana disse...

Buonos dies,

L cierto ye que nun ye quedando solico,a nun canto que un puode progredir. Ua classe ye siempre un motor que permite stablecer un antercámbio, un diálogo que dá bida a las lhénguas, als homes... I la bida cuntinua nun mobimiento perpétuo i « apaixonante » cumo dirie Leonardo.

Parabienes anton tamien de la mie parte a todos ls que s’antréssan pul Mirandés i fázen l sfuorço de l aprender. Parabienes tamien als que aceitan de l ansinar i se dedícan a transmitir l que fúrun daprendendo eilhes tamien cun dedicaçon i la cumbicçon de star a fazer qualquiera cousa de útele i tamien de neçairo.

I a todos por cunseguinte: uas férias bien merecidas !

ACangueiro disse...
Este comentário foi removido pelo autor.
ACangueiro disse...

Tiu Almendra,
antendo que bos quereis meter cunmigo.
-Ls porsores çponiblizan son tiempo i naide ls paga. Stou d'acuordo quando dezeis: "hai que l'ansinar als nuobos";
-Cada un dá un cachico de seu tiempo i siempre se daprende algo, seia ansinando, seia daprendendo;
-Naide ten pertençones a ser doutor de la lhéngua mirandesa.

Mas...gusta-me l buosso comentairo.

Saludos,

antonho

Unknown disse...

Prima Ana,
Por andar nas telbisones i jornales porque se ténen alhá amigos, ó porque se ténen meia dúzia de atibistas alredror, nun quier dezir que se anda melhor acumpanhado ó que se ye mais coincido. Neste mundo global, quien bibe cul pobo nunca anda solo. Hitler e Salazar teníen bien gente a gritar por eilhes.
You nun stou acontra l que se faç, mas acontra l que nun se déixa fazer.
Antonho,
Si ye berdade que me quiero meter cuntigo, por dues rezones, ua porque sei que sós buona pessona i outra porque dás muito de l tou tiempo al mirandés i ajudas a çcutir i a tener bibos ls amantes de l mirandés. Nun sós cumo ls que quíeren aparecer i solo apóian ó aparécen, se son las streilhas de l porgrama.
You filmou, dou amboras, colaboro cun todo mundo, mas hai ls que solo dan amboras deilhes i de l que eilhes fázen. Nunca naide me biu ne ls retratos i ne ls bideos. You ye que sou l agabarrion?

Adelaide Monteiro disse...

You bien gustaba de alhá haber stado anque fusse you l retratista i nun salisse ne l retrato. Mas tamien, ua aluna que nun bai a las classes nun merece nien forfalha de l bolho.
Ye l précio de la mandrionice!
Stou a meter-me cun bós. Tube pena nun star mas nun staba por Lisboua.
A ber se palanho bou a las classes para me dardes l diploma de fin de curso...

Beisicos a todos ls de l retrato.
Que guapos stais!


Delaide

AF disse...

Buonas nuites Delaide,

Sentimos la tue falta. Tenes que te animar para outra beç.

Bien haias Antonho pul testo.
L retrato ye de Patrícia i quedou porreiro.
Pa l anho alhá staremos. Debagarico, cul pouco que podemos, un anho de cada beç.

Abraço arrochado
Amadeu

ACangueiro disse...

Delaide,
nun quedes triste, todos sabemos cumo gostaries de ter stado alhá mas a las bezes nun se consegue star adonde mais gostamos.

Patricia,
l retrato stá mui pinpon, ainda bien que Amadeu fizo essa referença.

franciscobelharino disse...

Buonas tardes Antonho,

Parabienes pul testo subre la cena d' ancerramiento de las classes de mirandés an Lisboua. L retrato de Patrícia stá guapo. Un bien haia a todos ls que dun ou doutro modo dórun un cahico deilhes para que todo isto fusse possible.
Un abraço,
Francisco

NunoDeimingueç disse...

Ola a todo l mundo.
Çculpai-nos por l atraso na respuesta mas estubimos de ferias an Parada de Bragança. Estubimos longe da anternet e destas modernidades. :-)
Obrigado a todos por sue presença. Foi un prazer recebir-bos e foi ua noite bien bona.
Nesse die, a las binte e dues horas e quarenta e siete minutos, Mariana feç 2 meses, mas ja dormia e num lhe cantámos ls parabiens.
Buonas ferias para todos e inte setembre.