21/06/11

Unisseixal - Ten sido mui anriquecedor



Star lhigado a porjetos cumo este de l ansino sénior, ye bien anriquecedor, sien star cula eideia d’agarrar l tiempo dantes, quien stá porqui nunca perdiu nada na bida, bien alrobés, todo yá ganhou.

Todo l mundo cunta yá cua formaçon, seia eilha porfessional, académica ou de bida, puis la maiorie yá stá aposentada, mas por ganas própias armanou-se nesta acupaçon de acupar l tiempo, puxar al de riba conhecimientos adrumecidos, rebibir i melhorar ansinamientos, fazer l que le da gusto, ajuntar-se an classes, fazer amigos i arredar-se de l que mais cumbida neste eidade, nesta temporada de bida, que ye parar, quedar sien fazer nada, çponible para que antre ne l cuorpo l anfadamiento, la solidon, ls pensamientos malos, las maleitas.

Als que eiqui bénen antienden bien este sprito ampreendedor, que dá todas las possiblidades dun negar-se a quedar parado a la spera que ls dies pássen, las nuites chéguen, la cama tolha ls uossos, l stress bote semiente na cabeça, ls conhecimientos apóchen.

Cua baliente bariadades d’ouportunidades, nun hai naide que tenga batido a la puorta de la Unisseixal i nun tenga ancuntrado algue de que guste fazer, ye tamanha la quantidade i çponiblidades de classes, que to l mundo se sinte sastifeito.

Mais un anho stá ancerrando las sues atebidades scolares, mais ua proba dada por todos aqueilhes que de coraçon i alma s’antregórun a este porjeto birado pa ls outros, un porjeto de carátele cultural, i porque nó dezi-lo social, porque estas acupaçones tamien se rebélan ser perbentibas na bida de cada un cumo eilemiento dua família, dua sociadade.

Sociadade que cada beç ye mais eisejente, para las bariadas andadas sociales, sendo la sénior ua de las que mais cuidados percisa, sendo esta ua de las que mais merece, i s’eilha fur bien tratada ye pula cierta la que mais ambaidecer la quemunidade.

Tener muitos anhos, ser bielho, yá to la giente antendiu, i inda bien, nun ye cousa de botar fuora, bien alrobés, ye acumparatibo (sinónimo) de muita spriéncia, de sabedorie. Trabalhar para esta andada de la sociedade ye trabalhar para mantener un património que las sociadades anteligente nun se puoden dar al luxo de çprezar.

Star nun porjeto cumo la Unisseixal ye star a dar a nós mesmos mais ua ouportunidade de tener melhor culidade de bida, porque puodemos partilhar spriéncias, porque mos ye ouferecido toda ua semba de cumbíbios, besitas, atebiades çportibas, culturales, palhestras, ancuontros, zafios, quelóquios adonde cada un de nós puode tornar a todo aqueilho que fui assembado al lhargo de ls anhos.

Todos nós mos alhembramos de l tiempo, que até stá bien acerca, adonde chegar a la terceira eidade era quedar assientado nun scanho ou nun puial a la puorta de casa, puis esse tiempo alhá bai, agora grácias a porjetos cumo este, agarrado pula Casa de l Eiducador do Seixal (CES) nun percisa mais de se quedar a fazer cuontas, nien a botar cuontas a la bida.

Hai si que fazer cuontas, i estas buonas son de fazer, l porjeto Unisseixal, passou bien pa riba de l cultural, fui acupacional, terapéutico, associatibo.

La Unisseixal ye un spácio anriquecedor, assi to la giente por esse paiç afuora tubisse la possiblidade que la populaçon de l Cunceilho de l Seixal ten.

Quando ls porjetos son feitos por causas nobres, por pessonas que solo quieren l bien de ls outros, solo puoden tener de nós todos l reconhecimiento, un muito oubrigado, un bien haia a todos bos de ls uorganos de direçion i admenistraçon.

5 comentários:

José dos Anjos Rodrigues disse...

Amigo Faustino.
Cul tou angeinho i arte de bien dezir las cousas, retrateste bien l porjeto da Unisseixal. Nun ye perciso dezir mais, stá alhá todo. La bida ye esso mesmo: ser eidoso, nun sgnifica quedar parado, mas si cuntinar a fazer porjetos de bida, que ne ls balorizen!..Ye guapo i recomenda-se a todos.

Un abraço amigão
José dos Anjos

ACangueiro disse...

Quien bos oubir falar/screbir inté parece que bós, ambos ls dous, sodes bielhos. Jobes assi inda tenen muito que dar a todos.

Abraço arrochado para ambos ls dous,

Antonho

Almendra disse...

Todas essas cousas son amportantes, mas nun deben ser para dous ou três scuolhidos a dedo, cumo ya se fai eiqui an Miranda. Inda nun se criou la Ounibersidade Senior i ya hai porsores, mandantes i ampregados.
Fui l miesmo cul anstituto de la lhengua, la academie de letras, quien puode manda, cul denheiro de ls outros nun custa nada.
Será que las taticas politicas inda nun acaban?

faustino.antao disse...

-Son amportantes
-Nun hai dúbedas nanhuas cumo dizen ls cometairo, i muito an special cumo diç Almendra
-Mas estes porjetos ténen que star çpidos dessas cousas i pecados quel diç i bien, nun ajúdan nien dan aqueilho para que fúrun feitos
-Porqui este adonde you stou fui agarrado pula Casa de l Eiducador do Seixal, an Almada por un Uorgano de ls Porsores Aposentados, ye trabalho boluntairo, l'outarquie solo dá aqueilho que puode l demais son parceries cun anstituiçones, scuolas, associaçones çportibas i culturales i las freguesies.
-Apuis hai muita giente trabalhando i motibando para lhebar las pessonas para conhecer património, cultura, questumes i gientes cun einiciatibas de regiones (Miranda de l Douro yá fui ua deilhas, la lhéngua, la geografie, l sou quemido).
Eiqui quédan dous linkes para conhecer melhor la bida de la Unisseixal:

http://www.unisseixal.org/

http://www.unisseixal.org/main.php?cat=actividades

Almendra disse...

Quedo cuntento an saber esso todo, tambien antendo que deberie ser assi, mas porqui sconden las cousas para apuis se agabaren. Fui antes i cuntina, mas hai alguns que stan siempre culs que ganhan. Se nun son pula politica son puls studos, se nun ye puls studos ye por ser amigos.Ten que haber eigualdade de oupurtunidades para todos. Cul denheiro de todos nun se fazen fabores.