23/06/11

IV Ancuontro de Blogueiros Mirandeses

Caçareilhos - Capielha de Santo Cristo






Caçareilhos - Santa Lhuzie
www.fapa.no.sapo.pt




Angueira - Parque de Merendas
www.angueira-angueira.blogspot.com


Calhando, cuidábades que podiedes treminar las bacanças assi a la buntadinha, sien le dar parecer a naide i sien tener tento na repunsabelidade que ye fazer parte desta quadrilha. Stábades bien mal anganhados!

Tal cumo quedou treminado l anho atrasado, l IV Ancuontro de Blogueiros Mirandeses (abierto a tod'mundo que querga fazer parte) ten die i sítio ciertos, a ber se pori bos fazeis zantendidos.



Die 20 de Agosto (sábado), ampeça na Capielha de Santa Lhuzie, ne l termo de Caçareilhos, apuis passamos a ber l que houbir que ber an Caçareilhos i ls trabalhos cuntínan ne l Parque de Merendas de Angueira. Pus ye, salimos de l cunceilho de Miranda, mas nun salimos de l território mirandés, yá que nestes dous pobos de Bumioso tamien se fala mirandés. Y ye que apuis, yá bedes, l termo de Caçareilhos apega cun San Pedro, i Angueira ye lhougo a seguir, de maneira que nun puoden ser tierras malas.

Ls repunsables stan a trabalhar cun fuorça para oultrapassar to las deficuldades i cunseguir acertar ls redadeiros puntos de l porgrama, mal apenas haba nobidades, deilhas darán conhecimiento (cun ua tirada destas, nien sei cumo nun me cumbídan para ua Secretarie de Stado).

Bamos a fazer las anscriçones - ó eiqui ó ne l blogue de ls Ancuontros - que hai que saber para quantos cientos se manda fazer l quemer. A mi inda me stá a saber l pernil de anho atrasado, mas tengo anformaçones perbeligiadas (i dezir que nun hai quien arrepare, al menos ua sub-secretarie de Stado!), tengo anformaçones que la cousa este anho nun le bai a quedar atrás.

4 comentários:

Almendra disse...

Yá tenie ganas desso. L'outr'anho nun puode ir mas desta beç cunta comigo.
Abraço
Tiu Almendra

ACangueiro disse...

Haber se alhá staremos. La logistica ten que ser feita i mui bien. Buono, acho que podeis poner dous de la mi parte.

Antonho Cangueiro

Adelaide Monteiro disse...

You si quiero alhá star, puis mirai que bantaige! Cumo se habie de fazer!!!???
Apuis bos dezirei quantas bocas lhiebo pal almuorço.
L sítio ye guapíssemo i fresco

Á Alfredo! Tenes toda la rezon quanto als cumbites que nun te chegórun. Yá dous anhos seguidos delantre de la ourganizaçon desse amportante eibento, mira que l currículo queda gordo i,... quien sabe alhá apuis!...

Un beisico,

Delaide

leonardo antao disse...

Amigo Alfredo Cameiron,
Alhá starei, a menos qu'antretanto surja algun grande "cuntratempo".

Amigos de l mirandés,
Se soubissedes l'amportança destes Ancuontros de Bloguers Mirandeses pa l'angrandecimiento de la lhéngua mirandesa, correrídes todos, ne l die 20 de Agosto, para Caçareilhos i Angueira.

Un abraço arrochado,
Leonardo