... i apuis quedo-me a falar cul caiato ...

Crónica publica ne l Público de 23 de Márcio



Se you fura a fazer couso de l que dízen ls jornales, cumo tal ciertas pessonas que ténen seluçon para todo, staba bien amolado: uns dízen que nun adelantra l Stado andar a arramar denheiro pul anterior de l paíç, este quarto de las traseiras adonde se pónen ls talabancos i por esso ye un çparate apimponá-lo muito; ye un mal sien cura, acrecéntan outros; l melhor ye deixar andar i apuis cada un que scuolha, si que la scuolha ye l mais amportante, dízen inda outros d’anriba la sue calentura cínica. Mas a mi pouco m’amporta que dígan essas cousas todas, que tanto se me dá que baia parriba ou que baia para baixo, mas que nun ténen rezon nun ténen. L que me bai balendo inda ye la telbison que me trai ls males – si pouco mais que ls males – de l mundo para casa i apuis quedo-me a falar cul caiato subre l que bai pul mundo i a la bista desso todo splico-le que la nuossa bida até nien ye assi tan mala, a la bista de ciertos creminales que por ende ándan i ls pónen a mandar ne l mundo.
Salo pa la rue i nun hai un germo, acá naide me ben a ber, i apuis las piernas yá nun zambuolben, que l rematismo le aperta las jogas de ls uossos mais do que arrocho an carga. Nien na cama se me stá bien, que ls uossos yá nun assosségan de maneira nanhue, ls almanechas, i assi dou cumigo an bolandinas de l lhume pa la cama, de la cama pa l puial, de l puial pa l lhume, de l lhume pa la briada, de la briada para lhado nanhun. Agora, tornando a esses de ls jornales, nun adelantra muita matacion que hai seclos que outros pénsan cumo eilhes i ye por esso que todo stá assi, i inda porriba cúidan que sáben todo, a la bista de l modo zambuolto cumo fálan.
Tirando uns cachicos, ando siempre you solo. Rejisto, a passar l cinema de ls mais de uitenta anhos que por acá ando: uas bezes beio todo assi a modo de nubrina; outras bou ua sumana anteira atrás las bacas pa las lhebar por ende abaixo, solo cun uas patatas cozidas ne l bolso de la jiqueta; apuis ben la Fráncia nua altura an que inda botaba fumo de la 2ª Grande Guerra; i siempre a arrastrar-me atrás l arado, ou l que fusse, para que la fame de pan nun crecira. Ye assi, a traier esses cinemas todos que bou deixando de star solo, que essa ye la casa que me fui fazendo pula bida afuora, las lhembráncias que me dízen quien sou: mal stá l miu bezino deilhi abaixo que perdiu las lhembráncias todas, cuitado, i bibe na mais grande soledade que manginar se puode. Ye pulas lhembráncias que abaixamos por nós abaixo i pul tiempo, ye por eilhas que sabemos quien somos i mos bamos lhigando al mundo, son essas lhembráncias que le bou cuntando al miu caiato, de modo que el yá sabe tanto cumo you. Se fura nuobo inda daprendie a poné-le un xipe, cumo le cháman, al miu caiato i apuis grababa todo, mas essa ye ua eideia que un nuobo nunca poderie tener. Caiato de chapoda cumo esta nun agárran eilhes por alhá i tamien se beníren a ambestir para acabar cun eilhas, mais bal que nun béngan.

amadeujf@gmail.com