11/11/07

Petiçon: quien me quier falar?


Quien me quier falar?


Deixai-me cuntinar cula bida colgada de l sonido, cumo fago hai cientos de anhos.
Parece andeble esse miu cuorpo, mas nun conheço outro mais fuorte.
Gusto muito de la scrita, de las letras ancarreiradas. Mas esso ye assi mais cumo un retrato. Na scrita nun cuorre tan caliente l sangre, nien deilha sal música que me faga beilar. La scrita ye assi a modo ua squina adonde quedo a la spera de quien me querga dar la mano de la fala, de la lheitura, de la declamaçon, de l íntemo pensar. Zambolbei-me na scrita, para que tamien por esse lhado biba.
L que teneis contra esses sonidos cun que bos arrolhei? Porque nun me deixais antrar an bós i salir dalhá cuntenta, cumo sonido?
Bós que dezis que gustais de mi: falai-me siempre i an to ls lhados. Se nun fur assi, anton mais bal que bos cálhedes, que nien anganhais a naide i muito menos a bós i a mi.

Sem comentários: