14/03/12

Minissaias



Outra que quaije parece mintira;

"Un colegio francés bedou l uso de minissaia a 20 de las alunas que querien festejar l Die de la Mulhier; diç que nun fui para las castigar, fui para que ls rapazes nun le faltáran al respeito. 80 i tal por ciento de ls pais áchan bien i tamien stan pula beda."

Ah rapazes, you nien me querie fintar! Se fura an Pertual, un paiç probe i atrasado, ambrutecido pula moral cunserbadora de l'Eigreija, inda bah que nun bah, agora na França, l paiç de la lhuzes, l farol de le cibelizaçon, ua naçon que quemanda ls çtinos de l mundo... i, isto, inda podie ser ua zízara de l Diretor de l colégio, que yá se sabe que a las bezes amalúcan i naide le puode ir a la mano... mas nó, ls pais tamien stan pula beda, mirai ls franceses, un pobo que tanta beç mos dízen que ye l más abançado, tan lhibaral, siempre tan corretos, i sálen-se c'ua destas yá cul seclo XXI a deixar las calças rachadas...
You sou-bos franco: tube que ler dues bezes para me fintar bien; i yá iba a passar alantre, quando l facanito berde que a las bezes m'aparece eiqui a rabiar se me arrimou al oubido i me dixo c'ua risica de caçoada: mira que ambora tan a la moda para poner ne l Froles!

5 comentários:

Ana disse...

I fustes a saber de l'ambora nesse jornal, l Correio da Manhã ?!!

Esso anton ye que a mi me faç rir!

Ye de mui grande nible i balor anteletual essa buossa fuonte adonde fustes beber cun essa sede. Ls franceses tamien sáben apreciar.

Tortulhas disse...

Biba, buonas nuites, Ana,

Podemos anton quedar ciertos que nun teneis nada que dezir subre l'ambora; an beç de falar de l choclate, quereis más bien falar de la pratica an que stá anrebulhado; apúntan-bos para la lhuna i bós mirais pal dedo... Ye ua pena nun quedarmos a saber la buossa oupenion... you cunfesso que staba curjidoso: para quien eiqui atrasado le pareciu "ancebelizado" i ua afronta grande haber missas nas scuolas de Miranda i agora nun tener nada que dezir... esta ambora nun bos fazer sequiera uas cuçquinhas, nun sei que me parece.

De l restro, acabo de çcubrir outra "afenidade" cun bós: tamien nun me chaldra muito l Correio da Manhã esse, que dá muito "al sul" i al benfica!
Mas mirai que nun hai muito que l dar al çprézio, cumo peç que bós quereis dar a antander, nien yyou cuido que isso bos chuba l buosso "nible i balor anteletual".
You, por mi, cada beç que l acaço ne l café, dou-le siempre ua boltica: para alhá de ser l jornal pertués cun más tiraige, ten ua quadrilha de cronistas que nun ye assi tan rasca i que you - cunfesso l miu fraco nible anteletual - le dou siempre ua cheirizeladica. Assi de repente solo ls más cunhecidos i que me lhembra: Jesé Medeiros Ferreira, político bien cunhecido; Francisco J. Viegas, Secretairo de Stado de la Cultura; Ângelo Correia (pai eidiológico de l nuosso Purmeiro Menistro); Rui Pereira (ex-menistro de l'Admenistraçon Anterna); Bagão Félix(ex-menistro de la finanças); Carlos Zorrinho (xefe de la bancada parlamantar de l PS); Marques Mendes (ex-persidente de l PSD); Joana Amaral Dias, para que nun dígades que nun hai mulhieres, i quédan bien repersantadas... un tagalho de figurones bien cunhecidos, i, cun buossa licença, inda más dous, que you cuido que son ls melhores i bos requemendo, ambora muita beç nun cuncorde cun eilhes: João Pereira Coutinho i António de Sousa Homem.
Nun hai que un le dar muito la risa cun sobérbia, ah Ana, nun bedes que yá J. Nicholson dezie que solo cumpraba la Playboy pula culidade de ls scritos.
Abraço

Ana disse...

La choclatada stais aqui bós cun l’antençon eibidente de la fazer i cun ataques pessoales, mas mais grabe inda : cun argumientos i apreciaçones cumpletamente falaciosos !

Quien sodes bós para dezir que nun tengo nada que dezir subre l'ambora ? L que sabeis bós ? Stábades a la spera que you disse la mie ouenion i nun la tubistes ? Cumbencei-bos anton que nun ye tan fácele cumo pensais « apuntar un para la lhuna » cumo dezis i cunsiderai tamien que hai cousas que pula cierta se merécen... cumo l choclate... que se dá als garoticos por eisemplo !

Só se le dá quando sabemos que hai respeito i nó l risco eibidente de deformaçon de l pensamiento i de palabras que fúrun anteriormente ditas. Nó, amigo!, you nunca cheguei a dezir que me parecie "ancebelizado" i ua afronta grande HABER MISSA NAS SCUOLAS DE MIRANDA. Nun fui esso que you cheguei a dezir eisatamiente i ye pena que nun séiades capaç de antender de maneira mais antlegente (cula cultura que ye la buossa! mas que cultura afinal?) l que you tentei splicar na altura. Nun ledes bien, un ten que ter la coraige de bos lo dezir, i cometeis l erro grabe de tentar dar a antender que ls outros ye que ténen la culpa. Purparai-bos anton para ancuntrar cada beç pessonas para bos dezir francamente las quatro berdades que inda precisais muito de oubir!

Quereis cumbencir-me que L Correio da Manhã ye un jornal de culidade ? Nun me cumbencistes.

I acabo inda dezindo-bos só esto. Chamou-bos assi tanto i dessa maneira l’atençon essa ambora subre uas quantas minissaias nua scuola francesa antre las miles i miles que eisísten an França cumo se fusse ua cousa de l’outro mundo ?! Tenie que haber un! Cumo talbeç tamien uns quantos nessa Radio Télévision du Luxembourg... Puis quedai a saber que aqui ne l paíç adonde l caso se passou cumo splica esse buosso jornal tan amportante adonde fustes a saber de l’ambora you sou ua que nun oubiu dezir l quier que seia subre esse assunto i cumo you quaije toda la giente aqui an França tengo la certeza bien mais preocupada cun assuntos bien mais sérios i bien mais grabes tamien… La rezon ? Porque esse assunto nun antressa absolutamente nada ls franceses ou bien menos que l que bós eimaginais, na realidade. Bonda só dezir ou sien perder mais tiempo porque esso nien bal la pena : Ua scuola, amigo, nun ye ua discoteca ou ua sala de spetaclos para passar l tiempo a ler pornografia ou jornales dubidosos (cumo esse que tentais defender) an relaçon (antre outras cousas) a la cundiçon de la mulhier…

Afinal parece que si, que ampeçórun a bos-lo dar l choclatico esse que tanto sperábades... Mas un cachico, un cachico só ! Cuntentai-bos por anquanto cun l que acéitan de bos dar... talbeç por tener pena de bós !

Tortulhas disse...

Buonas nuites, Ana,

Muita faramalha, muita faramalha, mas çclarar se stais a fabor ó contra la beda de la minissaia na scuola, moita, stá queto! Sien oufénsia, fazeis-me lhambrar l perro de l miu bezino, que dá siempre trés ó quatro buoltas antes de se deitar

Ye isso que me fai spece, Ana: bós siempre eiqui cun peditórios para la mardomarie de "santa oubejetebidade" i agora nisquiera ua bela sodes capaç de le acender!...
Pus claro que l assunto nun ye mui amportante (para mi bundaba que fura na Fráncia para nun tener muito antresse ;) ), mas bós, que nun bos cansais eiqui de dezir que sodes porsora, algua oupenion habeis de tener, al menos ne l "plano eideológico", achais bien ó mal la beda de la minissaia?
Ye que you nun acabei bien de antander la lhigaçon que fazeis antre la minissaia de las rapazas i la scuola nun ser niua çcoteca nien casa de spetaclos... burrice mie, claro, que la buossa scrita ye clara i oubejetiba cumo l'auga que bai l Douro abaixo.
Abraços

leonardo antao disse...

Buonas nuites amigos Ana Maria i Tortulhas,

Este testo i estes buossos admirables comentairos fazirun-me lhembrar que las mulhieres son mesmo straordinárias.

Beiamos bien: son duonhas de casa, ténen ampregos, por bezes, cun grandes cargas horárias, ténen d'ir lhiebar i buscar ls filhos a las scuolas, normalmente son eilhas que fázen las cumpras i que cozinan todos ls dies. Cumo se nun bastasse inda ténen qu'eiducar ls ninos i ajudá-las a fazer fazer ls trabalhos de casa passados pula scuola.

Depuis cunseguen un milagre: aparecen todos ls dies bien perfumadas, sorridentes, i cun guapas menissaias, para tornáren ls homes ls mais felizes de l mundo.

Bien haba a todas las mulhieres.
Para todas las mulhiers, un beisico de l tamanho de l mundo,
Leonardo