-Cumo zde algun tiempo beniemos dibulgando ne l site de l'Associaçon, uorgano oufecial, staba terminado pa l die 11 passado (onte), un torneio de dibulgaçon de fito tradecional de la tierra de las ouriges de la maiorie de ls ASSOCIADOS de l'Associaçon Cultural i Recreatiba Nial de la Boubielha.
I assi acunteciu, a la hora marcada alhá stubírun alguns associados i amigos, botórun manos de la cunca i bota de çincadas palantre, alguns mais certeiros outros nien tanto, mas nestes jogos hai ua regla d'ouro, tanto joga l buono cumo l malo, porque l oujetibo ye partecipar, matar las saludades, mantener ua atebidade cultural i receatriba i para alhá de todo nun deixar muorrir-se ua tradiçon, que sendo de muita nomeada ne l praino, se puode ber que bai agarrada para adonde fur un mirandés.
Alguas questones se puoden poner, ua deilhas ye porque nun staba muita giente, you nun sei respunder, mas sei que esta geraçon de pessonas que porqui ándan (fuora de l praino) hai muito tiempo, inda ye ua repersentaçon berdadeira i fiel de "jogar l fito". Nas reglas, joga-lo cumo se jogaba alhá puls sous pais i abós, i ne l que toca al animo i antusiasmo cula mesma fuorça.
Esta einiciatiba, assi cumo l torneio de cartas "çueca " yá feito, ben ne l sentido d'animar mais ls jogos tradecionales andrento de las atebidades de l'Associaçon al lhargo de l anho, i cuntemplar las ganas de muitos associados que áman ls jogos tradecionales, buntade salida ne l'Assemblé Giral.
Quier la Direcion quir l grupo de trabalho para este fin, cuido you, debie ir mais loinge aporbeitar i melhorar pa l Cumbíbio/Jogos de l 1º de Maio i, antegrando-se ne ls jogos pormobidos pul'outorquie. Quedarie assi atamada la falta, la nun partecipaçon de la nuossa quemunidade ne l ambito giral pa l qual ten sido siempre cumbidada.
2 comentários:
Buonas tardes Faustino,
La tarde de l die 11 de márcio, fui passada a jogar l Fito por ua dúzia de jogadores de l' Associaçon Nial de la Boubielha i tubírun cumo campanha mais alguns associados. Esta ye ua maneira saudáble de passar l tiempo, de reber amigos i zanferrujar un cahico la nuossa lhéngua.
Cumo die 18 de márcio ua manada d' associados de l Nial de la Boubielha bai particpar ne l torneio de Malha ourganizado pul Clube Alto do Moinho i inda que l jogo seia asparcido cul Fito, nun quejírun deixar de treinar un cahico cun las malhas de fierro i daprender la puntuaçon que ye mui çfrente de l jogo de l Fito.Stan anscrebidos cinco pares de l' Associaçon Nial de la Boubielha, mas se quejires antrar ne l torneio, las anscriçones cuntinan abiertas.
Un abraço,
Francisco
Amigo Faustino,
Parabienes als qu'ourganizórun e als que parteciporan na dibulgaçon de l Fito, que ye un de ls jogos tradecionales de mais nomeada i que melhor carateriza las ouriges de la maiorie de nós ls associados de l'Associaçon Cultural i Recreatiba Nial de la Boubielha.
Ambora cun pouca participaçon d'associados, este torneio de fito i de malha custituiu un amportante marco de cunfraternizaçon, antre mirandeses i pessonas de las tierras de Corroios, de balor ancalculable para mantenermos biba la cultura çportiba i recreatiba de l praino mirandés, assi cumo la nuossa mui stimada lhéngua mirandesa.
Un abraço,
Leonardo
Enviar um comentário