23/03/12

LS ANHOS DE JANTONHO


LS ANHOS DE JANTONHO


Toda la stória ampeçou

Fai sessenta i cinco anhos atrás

Que ne l lhugar de Palaçuolo

Adonde naciu l rapaç


Las culpas las tubírun

La tie Ana i l tiu Chico

Pus nua nuite d´amores

Fazírun este chuchico.


Naci nun doze de Márcio

Qu´era la feira an Sendin

Que me habien cumprado na feira

A mie me dezierón assi(n).


Dues armanas yá tenien murrido

Naquel momento perciso

Fiquei cun Mariana i Oulibia

Cun Angrácia i cun Nacisio


L rapazico alhá se criou

Pa l bien ó pa l mal

Pul meio d´alguns trambulhones

Cumo ye natural


Passou todo tan a priessa

Que you nien dei por isso

Lhougo mie mai se muorrie

Apanhando nabiças no chapiço.


Fui un choque mui grande

Mas la bida nun parou

La ruoda seguiu rodando

Anté que la mie s´ancrabou.


Muitos anhos mais alantre

Muorrie-se tamien miu pai

You inda por eiqui stou

A ber l que la bida me fai


Hoije stou eiqui ne l lar

Depuis de muitos anganhos

Junto culs mius belhicos

Festejando ls mius sessenta i cinco anhos.


José António Esteves

10 comentários:

ACangueiro disse...

Tiu Jantonho,

purmeiro parabines, sigundo quien fai bersos assi ten que ter parabines a drobar.

Bós poeta sois i bersos guapos fazeis que para l anho que ben mos presenteis cun outros tantos ou mais.

ACangueiro disse...
Este comentário foi removido pelo autor.
Tortulhas disse...

Buonas nuites,

Abraço arrochado de parabienes; que fágades muito i nós que ls cóntemos!

D'hoije nun anho!

Alfredo

AF disse...

Caro amigo

Salude i un grande abraço de parabienes. Que d'hoije nun anho.

Amadeu

José Esteves disse...

Buonos dies a todos

Hei-de fazer ls que me deixaren
Que you inda nun stou cansado
E pe la buossa amablidade
Muito mas muito oubrigado.

Abraços

J.A.Esteves

"Scacição" disse...

PARABIENES cun un abraço Tiu Jantonho,i d'hoije nun anho que cuorra pul mesmo canho.
Bien haiades i fuorça i muita anspiraçon para screbirdes muitos bersos.

leonardo antao disse...

Buonas nuites tiu Jesé Antonho,

Cuntai muitos, siempre cun salude.
Gustei mui deste buosso poema i para esta lhéngua arribar bamos a seguir cula scrita sien mos squermos de la falar.

Un arrochado abraço,
Leonardo

franciscobelharino disse...

Buonos dies Jesé Antonho,

Parabienes inda que seian un cachico atrasados. Parabienes tamien por tan guapos bersos. Amigo Jesé Antonho la colheita de 47 ye de las buonas i por isso sodes l home baliente i un de ls grandes oubreiros de la poesie mirandesa.
Un abraço arrochado i buona Páscoa,

Francisco Domingues

franciscobelharino disse...

Buonos dies Jesé Antonho,

Parabienes inda que seian un cachico atrasados. Parabienes tamien por tan guapos bersos. Amigo Jesé Antonho la colheita de 47 ye de las buonas i por isso sodes l home baliente i un de ls grandes oubreiros de la poesie mirandesa.
Un abraço arrochado i buona Páscoa,

Francisco Domingues

José Esteves disse...

Buonos Dies para todos.

Anibersariar ye ua amostra
De ouportunidades para aprender
Que mos lhembra custantemente
L tiempo que mos falta biber.

Abraços.


J.A.Esteves