20/03/12

África




Hoije, atupinei sien querer, quier dezir, nun fui muito sien querer que you inda fiç bien por isso, i atupinei anton nun testo de Mia Couto que me regalei a ler i que, calhando, tamien bos puode prestar, Mia Couto ye cumo las minis de cerbeija: cai siempre bien más ua!
Amenta an porsores i an África i an muita cousa.
Dízen por ende que hai muito de Pertual an África i un cachico de África an cada pertués, i ye capaç de ser cierto: you tengo esta manha de nun me amantáren an África que nun se me lhembre miu pai que stubo alhá na guerra, de maneira que, para mi, sirbe tamien para assinalar l die nomeado. You traduzo l ampeço assi a mo'de bos criar antolho:



"Durante anhos fui porsor. I quando digo isto hai ua eimoçon mui fuorte que me arrepassa. You nun sei se hai oufício más nobre que l de ansinar. I digo ansinar porque eisiste ua çfrença çancible antre ansinar i dar scuola. L porsor ne l santido de mestre ye aquel de dá liçones.
Ls porsores que más me marcórun fúrun ls que me ansinórun cousas que arrepassában muito la materia de la scuola. Nunca se me squece un porsor de la scuola purmaira que un die liu, quemobido, un testo screbido por el mesmo. Lhougo quando çclarou l que iba a fazer naciu l purmeiro spanto: nós, ls alunos, ye que faziemos redaçones, nós ye que las liemos an boç alta par’el mos corregir. Cumo ye que aquel home grande s’assujeitaba aqueilha çtroca de papeles? Cumo ye que aceitaba fazer algo que solo fai quien inda stá a daprender? (...)"





5 comentários:

faustino.antao disse...

Miu caro amigo

-Deiqui de als alredores de lisboua te dou ls buonos dies, tamien ls parabienes i l miu oubrigado por estas amboras.

-Nun fusse assi se calha até nun la ancuntraba i quedaba mais probe, porque quando se lei crónicas cumo esta un queda mais rico.

Un abraço
Faustino

Adelaide Monteiro disse...

Cada beç me gusta mais ler Mia Couto, esse moçambicano de cuorpo i alma, dun paíç adonde you medrei apuis de tener medrado.
Bien haias Tortulhas.
Ser porsor ye isso mesmo. Que tu cuntines a ser tamien assi, porsor.
You mesmo nun eizercendo tamien me cunsidero inda porsora, i mira que tengo soudades anquanto tube alunos que me deixórun sé-lo...

Un beiso


A.
Un beisico

Ana disse...

Fala esse outor moçambicano de ls porsores i nun só, nesse testo !

Cun el you tamien daprendi cousas hai yá uns anhos agora cumo por eisemplo l que ciertos Pertueses nuossos cumpatriotas fúrun capazes de fazer an Moçambique (Cousas buonas ?) quando esse paíç inda era colónia... nua de las sues obras cumo Cada homem é uma raça por eisemplo...

I ye ende que un se dá de cunta anfeliçmente que nó... que nien siempre fui l que fazírun ls nuossos cumpatriotas !

Cousas atrozes fui l que alguns fazírun, tamien hai que dezir la berdade !

Ls porsores que somos tenemos anton que dezir l que ye tal i qual Mia Couto que soubo i tubo la coraige tamien de l fazer! Ou haberá cousas de que alguns nun quieren inda hoije oubir muito falar ?

PS. Mais recentemiente, fui l anho passado que li E se Obama fosse africano ? Gustei de ler mais ua beç.

ACangueiro disse...

scribe Mia Couto cun la alma de quien muito sabe i cul amor de quien ama l que scribe!

Teresa Almeida disse...

Queda un regalado cun ls testos de Tortulhas!
Hoije arrepassou-le ua fuorte eimoçon.
Mia Couto, l porsor, la scuola tamien me deixórun quemobida.

Beisicos.