07/11/11
Stradas bielhas
Fui de Miranda até Sendin, nestes dies,
i tamien de Sendin até Mogadouro.
Mas desta beç pul IC
Eitinerário Cumplementar, nun ye berdade ?
Mas nun me lhembro de haber bisto outros carros,
a nun ser l miu, a passar por alhá.
Assi i todo, nun era de nuite
i stábamos, até,
na altura dun fin de sumana cun feiras i todo...
Ua bia rápida só para mi ?! pensei, anton.
Miraique !
Na buolta, nun m’apeteciu antretanto
tornar a ir pul mesmo camino.
La strada bielha ten inda muito que se le diga !
Ten stória i finalmente mais ancanto !
Ten casas, arbles
i subretodo giente
giente que bibe a la borda ou acerca.
Querer ir depriessa
cumo se un nun quejisse ber a naide... ?!
Que eideia bouba !
A mi, bonda-me ls 1000 kms que tengo que andar
zde mie casa, an França,
para chegar al Praino...
1000 kms durante ls quales nun me dá la gana
de parar todos ls 20 ou 50kms
porque tamien perciso de chegar.
Mas depuis...
Depuis,
un ten que cuntinar a ir pula strada bielha,
todas las stradas bielhas !
Hai qualquiera cousa nessas stradas que nun hai
i que talbeç nunca haberá
nessas stradas que uns fázen agora,
essas stradas nuobas
nuobas até nun poder mais !
Mas you, ye nas stradas bielhas...
Yá por aqui passemos...
Yá por aqui pensemos...
I por aqui inda quiero cuntinar a passar
A passar i tamien pensar !
Subscrever:
Enviar feedback (Atom)
6 comentários:
Ei Ana!
La pormeira beç que passei alhá, fui de carreira. Inda nun la coincie. Cumo iba yá quaijeque solica i ne l pormeiro santalho, dixe al rapaç que guiaba la carreira: Bá, eilha nun ye muito melhor que la bielha... Nun sei para que andaran cun tanta farroma!
El apuis até me dixo: You bengo porqui porque nun tengo naide para abaixar an ...( nun sei que tierra dixo!!!) porque senó, salindo, nun podie antar que l punton nun ten altura. Tenie que tornar al para trás uns quilómetros para apuis tornar a entrar. Puls bistos ten gatos!!!!
Apuis dezie el: cul miu carro yá andube eiqui a 190!
Faziste ua grande bantaije, pensei you!!! I ciert que aqueilhas retas dan mesmo para tunticos boláren...
Apuis passei alhá you no "bolicas" i an buona berdade nun me gustou la cousa aqueilha...
Agora lendo l tou testo/poema ye que me bieno a l´eidé que afinal de cuontas la strada bielha aqueilha ten stória na mie bida i, quien sabe se na mie cabeça nun haberie alhá feito un poema ou screbido un testo al mirar para aqueilhas bistas todas!
Antressante, Ana!!!!
Beisicos.
Yá quantá que nun mos biemos; eiqui la giente peç que se bei!
cumplementa-se l cumplementar! 520 Kms yá ye custoso, 800 kms que custoso mais será. Assi se mostra cumo nos gosta l nuosso praino. Hai uns tius que nos ampenharan, agora mamá-los todos...bondada ter tirado la strada de Santiado i de Sendin i uas aprainadelas, pouco mais.
Miraique !
Anicas,ye bien berdade l que screbiste,las "Stradas Bielhas" ténen outro ancanto...
Bien haias i beijicos mius:)
Biba a todas trés: Delaide, Teresa i Conceição,
Biba tamien, Antonho,
Miraique! Cumo dezis tamien, Teresa. Se furmos a ber, este sítio ye tamien ua strada mas ua strada adonde nun passa pula cabeça a naide, penso, querer ir, nós tamien, a 190 kms a hora ! Cumo ye que serie possible apreciar anton cada florica que bai aparcendo i que cumbida a todos a dar balor a todas las cousas de la bida ?
Hai stradas que son einesquecibles. Las stradas bielhas de l Praino fázen parte dessa catadorie. Son todas guapas, guapíssemas !
Antonho,
Ye berdade que a mi tamien me pareciu eisagerado habéren feito essa obra que ye a bien dezir algo faraónica. Quien sabe se l denheiro que fui ampregue (ampregue para uns poderen rodar a 190 kms/h cumo se tubíssen bombas nas manos ?) nun bai a fazer falta, i mais rapidamente que l que un puode eimaginar, para cousas mais eissenciales i ourgentes até ?
Ye pena porque na stória de Pertual nun fáltan eisemplos de denheiro que fui muitas bezes mal gasto i ampregue an cousas sien grande necidade, só para Inglés ber!... denheiro (por bezes als montones cumo un sabe esso mui bien) cumo deitado pula jinela para outros (ne l Strangeiro, por eisemplo) s’aprobeitáren i sabéren bien l que fazer cun el...
Aporbeitei tamien para corregir. La çtancia que mos separa de l Praino, ne l nuosso caso, atinge na realidade 920 kms (quaije mil); menos assi i todo que ls 1300 kms mais ou menos que mos sepáran de ls nuossos cunterráneos que bíben an Paris i arredores.
Un abraço a todo mundo i buonas biaiges a todos, mas siempre nas calmas i cumo debe de ser.
Enviar um comentário