13/11/11

GALA PREMIOS ARRIBE

.

TRABANCA – SALAMANCA

.
Fui onte la Gala Premios Arribe, mesmo aqui acerquita de Sendin, de l’outro lhado de alhá de l riu. Fui ua houmenage a todos ls que trabálhan para que haba riqueza, muitas bezes sien béren l sou trabalho recumpensado eiquenómicamente i até socialmente, mas quien faç l que gusta nun percisa de muito galardon, quier solo uns pequeinhos minutos de carino i de cumbibéncia culs amigos.
Pus fui esso la Gala de Sábado, cun ua proba de binos, un jantar an que cada partecipante tubo que pagar l sou, i la cerimónia de antrega de ls prémios.
Stubírun muito binicultor i biticultor, culs sous binos, mas tamien cun la sue alegrie, para que la Gala fusse un sucesso.
De bários sítios de Pertual i Spanha benírun ls premiados i tamien ls outarcas de las câmaras que quejírun star culs sous. Fui un modo de apoiar i recoincer l trabalho de quien acrecenta riqueza para acabar cula crise.
De Pertual fui antressante ber ls presidentes de l Praino i de Setúbal.
Tamien fui buono ber cumo la maiorie de ls einólogos de ls binos premiados i representantes de las bodegas éran guapas mulhieres, a amostráren que stan atentas i que quíeren custruir ua nuoba sociadade, mais bien gerida i melhor tratada.





Ende bos quédan dous pequienhos bideos, un de la proba de binos i outro de la antrega de prémios.

10 comentários:

ACangueiro disse...

l reporter siempre a dar nuobas scritas i eimages. Ls dous lhados cada beç mais achegados, esso ye buono.

Almendra disse...

Bien podies tener ido alhá, l termo pega cun Bemposta.
Se calhar stabas acá!
You tenie te lhebado.

ACangueiro disse...

Se por acauso stubísse ende tenie tido muito guosto tener ido mas nó. Stou acá para baixo. La bida nun yé cumo se quier mas cumo se mos bai dando.

Abraço,

antonho

leonardo antao disse...

Buonas nuites Almenda:

Parabienes por este texto i antressantes bídeos que faien la dibulgaçon dun amportante cuncurso anternacional de binos “Arribes 2011” pa ls binos pertueses cuntináren a cunquistar l mercado spanhol i sul-amaricano.

Tube coincimiento de qu'este eibento fui mui buono pa ls binos porduzidos an Pertual, porque ganhórun cerca de 30% de ls galardones d'ouro i prata que premiórun ls melhores binos.

Parabienes tamien als perdutores de binos pertueses que participórun neste Arribes.

Un abraço,
Leonardo

Almendra disse...

Bien haias Leonardo pulas tues palabras amigas para quien trabalha.

Abraço
Almendra

franciscobelharino disse...

Buonas nuites Almendra,

Parabienes pulas amboras i pul prémio que ganheste cun un de ls binos.
Un abraço,
Francisco

leonardo antao disse...

Buonas nuites Almenda:

Francisco stá a dar-me l'ambora de qu'un de ls binos premiados ye buosso.

Anton aprobeito para bos dar mais beç Parabienes pul prémio que ganhestes i por bos pedir que me anformeis l nome desse bino para na próssima passaige ende por Sendin, percurar cumprar-bos alguas garrafas.

Un abraço,
Leonardo

leonardo antao disse...

Ua beç mais, buonas nuites Almenda!

Acreciento a este miu radadeiro comentairo,… cumprar-bos alguas garrafas, para ajuda-bos tamien a criar l chamado “rótulo (ó marca) de culidade” i por bias desso para criar mais cunsumidores i para ajudar-bos a bender un buono perduto de l'agricultura mirandesa,l bino.

Un abraço,
Leonardo

Almendra disse...

Franciscobelharino,
You recebi un prémio, mas fúrun dous ls mius binos premiados, dues medalhas de prata.
Bien haias puls parabienes.

Leonardo Antão,
Ls mius binos son yá mui coincidos i yá ténen marca. Nun sabie que inda nun ls coincies, hai muita cousa ne l Praino que yá son coincidas pul mundo, inda que ls senhores de las telbisones i de ls poderes anstituidos, solo amóstren l que l'amporta.
Puode dezir te mais, yá fago bino zde 1960 i inda tengo garrafas de 1961.
L deste anho yá se bebe, inda que garoto, mas bai a ser un bino de ls melhores.
Quando quejires beber un bino de culidade, yá sabes, tiu Almendra ten siempre ua garrafa de ls melhores para ti, mas nun bendo porque ls que you fago son para mi i ls amigos, nun ténen précio ne l mercado.
Abraço als dous

leonardo antao disse...

Buonas nuites Almenda!

Fico cuntente an saber an saber que soles un buono perdutor de bino de culidade. Fico cun buntade de l probar, l que spero fazer un die que passe por ende.

Agradeço la buosso buona buntade i çponibelidade d'ua garrafa de ls melhores para mi.

Un abraço,
Leonardo