27/11/11

Ousteridades


“L’ousteridade ten de ser ancarada cumo la única salida (…) nun hai outro camino”
Miguel Relvas, lhiçanciado an Ciéncia Politica i Relaçones Anternacionales cula tenra eidade de, deixa-me acá ber, 46 anhos, pul’Ounibersidade de, deixa-me acá ber, Lusófona.


“L’ousteridade ye la receita para un se zgraciar eiquenomicamiente (…) s’abaixamos ls salarios, piora la procura i la recesson."
Joseph Stiglitz, Doutorado pul MIT cun 24 anhos, bancedor de la medalha John Bates Clark als 36 anhos i Prémio Nobel de l’Eiquenomie an 2001. Fui inda bice-persidente de l Banco Mundial.

Cumo diç l miu patrício Manuol Claro, "cad'un queda naquilho que le parece!"

4 comentários:

Fir disse...

Buonas tardes, Alfredo.

Miguel Relvas nun ye boubo nanhun. Mira, l diç que l' ousteridade ye la única salida, mas nun diç (pu l menos nesta citaçon) que ye para salir de la crise.

Por eisemplo, inda hai pertueses que suonhan cun ua bida digna i l' ousteridade ye ua buona maneira para salirmos desso.

Joseph Stiglitz até ten rezon quando diç que l' ousteridade ye la receita pa la zgrácia eiquenómica, mas nun diç cumo ye que, sin eilha, poderíamos pagar las fiestas de fin de anho de la Madeira.

Un abraço,
Fir

Adelaide Monteiro disse...

Fir,

Quanto a esse assunto muita tinta ten corrido i muita cuçpinha se ten gastado i nien bale a pena falar.
Casa adonde nun hai pan, todos rálhan i naide ten rezon!


Quanto a la Madeira que tamien ten ajudado a afundar, l porblema nun stá no fogo de fin d´Anho que ye ua cousa que atrai receitas no persente i ne l feturo.
Ende, l buraco parece-me que inda nun se amostrou até l fondo i isso si ye malo, assi cumo ye malo que ls denheiros de la recustruçon pública i particular que para alhá fúrun mandados, tenéren sido geridos por Jardin por maioria de botos na assembleia regional i que gastou l mais del na campanha eileitoral i ne l que quijo i mui pouco ó nada an medidas para eibitar outra catástrofe i tamien an obras, quaije que nada.
Tunes i mais tunes a furar i tirar la beleza natural feitos puls mesmos que ye cumo quien diç, cumpadres de l "dito cujo".

Assi i todo nun podemos perder la sprança.

Beisicos

ACangueiro disse...

anrezinaibos, botai-le uas palabricas mais azedas...ls paredones agora cun las giladas nun deixan las azedas salir mas arrimado a primabera bamos a azedas que apuis untadas cun azeite saben bien i siempre se unta la barriga.

L paíç antregue a pessonas de alto calibre. Mas quien quier ir a zedas? Stá todo mui agre.

Unknown disse...

Amigo Cameirão,

Todos nós tenemos l dreito i la lhibardade de screbir i defender l que pensamos. Tamien todos tenemos l dreito i la lhibardade de querer anfluénciar ls outros i de para esso outelizar ls meios que se pónen a la nuossa çposiçon. Mas quando mos ponemos a ambentar ó a querer outelizar l que ls outros pénsan sujeitamos-mos a ser cunfruntados cun outras oupeniones.

You antendo que ls dous eisemplos que deste i que stan ciertos i corretos, dében ser bien apreciados, para que ls menos abisados ó studados an eiquenomie, púodan antender melhor l sou senificado.

Faziste bien dezir ls studos de dambos a dous, porque esso ye eissencial para ls antender melhor.

Miguel relvas i agora acrecento you, ye tamien menistro de l goberno de Pertual i fui nessa culidade que dixo l que dixo. Nun fui nua aula de eiquenomie, ó para fazer scuola, an eiquenomie. Agora pregunto-te you. Se un pai ten 4 filhos i ten solo 100 euros para le dar ne l Natal, cumo ye que el diç als filhos habituados a recebir cada un 100 euros?

Joseph Stiglitz, por ser prémio Nobel i mui antendido an eiquenomie, nun stá arriba de todo mundo nesto de la eiquenomie cuncreta. Puode saber muita teorie, mas ls sous studos son subre la eiquenomie dominante, la eiquenomie capitalista, que quanto mais la giente gastar, mais l capitalismo crece. Parar l cunsumo solo puode ser malo, ye berdade. Cuidas que serie tamien esso l mais apropiado para la crise?

Stou miesmo a ber alguns a dezir, mas quien ye este para falar de Joseph Stiglitz?
L saber ye ounibersal… Bá pensai bien…Stamos ne l limiar dua nuoba orde…

L que se quier ye l cielo i tamien you l quiero, mas naide chega alhá por magie. Hai que dar las manos, nun ye çcunfiando uns de ls outros. Naide sabe mais, nun hai buonos i malos, nien son ls partidos que ls defínen.
L mundo ye de todos i de todo.