Alma lhibre, coraçon catibo

Nun boles para alhá de l alcance de l miu mirar!
Tengo miedo que t´apartes de mi,
i grima, muita grima
de deixar de te ber.


Nun boles para alhá de la cinta de la raposa
que nace ne l báfio dun resfolgo!
Nun boles para alhá de l camino,
ancruzelhada de dues bidas,
ourrieta de sentires cansados!

Anganho!
Eigoísmo!
Cumo se puode ser feliç,
castrando,
atafanhando!?


Amar ye lhibardade,
respeito,
sinceridade.


Bola!
L tou bolar solo a ti pertence:
Rastreiro, rente al chano dadonde me bés;
alhá bien alto,
arriba de todas las alturas de tous deseios,
dadonde me puodes ber,
eimage retenida
nas meninas de ls tous uolhos.


Bola i lhieba cuntigo
las gotas de ourbalho de l miu resfolgo,
para que puodas amboubar-te
nas quelores alhá nacidas,
acontra la lhuç de l tou mirar,
cinta de la raposa,
adonde te deitas,
drumes,
sonhas.


Boladeira sien palo,
papagaio sien baraço,
alma lhibre,
coraçon catibo.