16/09/10

UA CUONTA


PERDÍRAN-SE LS MACHOS

Ua beç an Palaçuolo. Un rapaç fui-se a percura duns machos que se l habie perdido, fui haber al cerrado de la freixenosa nun seia que l tubie-se dado na cabeça de iren pali. Ye un pouco loinge dixo, mas nestes cauos tengo que cunsiderar todas las pusseblidades, buscou l cerrado todo i nada, andubo pe ls montes anté fui haber a las huortas, quien sabe a las bezes puodien tener ido para alhá. Mas nada tamien nun staban . Caralho de machos parece que ls tragou la tierra. I agora que fago you, cumo bou you para casa sien ls machos, i quei l digo a mie mai, nó, nó nun puodo ir, tengo que ls ancuntra.
Dou buoltas i mais buoltas, mas ls machos nada de aparcer, l sol yá iba alto, yá debien ser ende las dues ô las três de la tarde i nada d´ancuntrar l conho de ls machos.
Parou un pouco para piensar, i chegou a ua cuncluson. Sabes que mais que se fodan ls machos bou mas ye a nius.
I assi fizo tirou toda la tarde a buscar ls nius i anté tube suorte qu´ancuntrou un de fulhecra, mas nun tenie nada, mais parcie bielho. Nun zanimou, anda qu´inda hei-de ancuntrar un cun paixaricos.
Animado cula eideia d´ancuntrar ls paixaricos quien sabe uns gaios que son grandes, i benie miesmo a calhar, yá you pudie ir para casa, anté yá l parcie, que yá l staban a saber, mas bô, furon cuchos ls gaios niechequiera uns cuquelhados que yá serbien bien.
El bien buscou mas defenitibamente aquel nun era l sou die de suorte, nien para paixaros nin para ancuntar ls machos inda dou mais uas bulotas mas nada, nin ua cousa nin outra.
Cumo se staba a fazer de nuite, i tamien yá tenie fame, si, que isso de andar un die anteiro pul termo miesmo sien que seia a paixaros, era cansatibo.
Pronto dixo, bou para casa i que seia l que Dius quejier cun mie mai, nun sou oubrigado a ancuntrar ls machos.
Quando chegou a casa yá staban todos mas preocupados cul rapaç que culs machos. Antrou dou las bunas nuites, i dixo lhougo sue mai a Zé tu ancuntres-te ls machos? You nun senhor? Mas ancuntrei outra cousa melhor? À, si, i quei era? Era un niu. Caramba que suorte tubies-te, i quei tenie perguntou la mai. Ô era bielho, ô andaba a fazer.
Pus si que tubies-te suorte!
Mas nós tamien la tubimos que ls machos yá stan na loija benieran eilhes solos para casa.
Cundanidos yá pudie you buscar? Pronto bai a lhabar las manos i ben a quemer l caldo que
s´arrefece.
I assi fui la stória, cun final feliç.
Aparcirun ls machos, i l rapaç ancuntrou un niu…

José António Esteves

3 comentários:

faustino.antao disse...

Buonas tardes amigo Jesé Antonho

-Caramba, que guapa cuonta.

Mirai bós que inda nun hai muitos anhos cuntabasse que un tiu na mie tierra percuraba ua burra, que s'habie scapado (dezie el) anriba deilha, i percuraba a to l mundo, só quando la burra, que nun l era de todo, antrou na loija i el batiu cula cabeça na piedra de riba ye que soube qua andaba anriba deilha.

-Caro amigo, hai dies pra todo.

Un abraço Arrochado
Faustino

José Esteves disse...

Buonos dies tiu Faustino. Essa de la burra tamien la cuontaban por palaçuolo. Mas esta dels machos, ye berdadeira. L rapaç ancuntrou um nial e ancuntraba que era melhor quels machos, las spressones son del, You só l´andonei la stória. Um abraço

José António Esteves

José Esteves disse...

Buonos dies tiu Faustino. Essa de la burra tamien la cuontaban por palaçuolo. Mas esta dels machos, ye berdadeira. L rapaç ancuntrou um nial e ancuntraba que era melhor quels machos, las spressones son del, You só l´andonei la stória. Um abraço

José António Esteves