09/09/10

Ténen las tues palabras


Puodes zbiar muntanhas cun tous feitos, ser un porfissional de cuorpo anteiro, puodes ser todo l que seias, mas seran las palabras que deixas screbidas que eiran perpetuar la tue mimória, la mimória de l tou pobo i la bida de la tue lhéngua.
Yá ls tous uossos seran cinza, la tue chicha puolo, la tue alma lhuç a ancendiar ua streilha, mas eilha, la palabra, será siempre fincon adonde pousen siempre ls mouchos to las nuites, las cotobias to ls dies, marco giodésico dadonde se abistarán to ls pobos que tu canteste cun ls sonidos de l soletrar de sílabas.
Teneran las tues palabras la dureç de l diamante bruto que cun nada se puode riscar, para perpetuaren la tue lhéngua i la tue cultura; al mesmo tiempo, tenerán la lhebeza dua smeralda nun peito de alabastro, la transparéncia de l´ auga de las fuontes i de l berde de l termo na primabera, para que l seia stramitida toda la belheza .
Ténen las tues palabras l correr sereno dun riu, adonde zaguórun ribeiros apressiados que caírun zamparados an cachoneiras, a scumar de susto.
Ténen las tues palabras la fuorça dun mar cun óndias de marés bibas que toda la arena de la praia son capazes de arrastrar.

Ténen las tues palabras l bigor de las muntanhas cun sues fragas que l aire bai alisando cun assopros, para formar balhes, adonde se deita la nata que fazerá medrar mais palabras ne l feturo.
Teneran las tues palabras la tue eisséncia, porque de palabras sós, pula palabra te dás i pulas palabras trabas batailhas.




5 comentários:

Almendra disse...

Hei Delaide,

Sabes que you i Marilia stabamos porparados para bos ir a ber a la Speciosa, mas la mie nuora fui ouparada d'ourgéncia a la pendece, mas corriu todo bien, l peor fui pal nino que cun cinco meses deixou de mamar la teta, inda bien que l miu Felipe ye jeitoso i tomou cunta del i Marilia tubo que ir pal Porto.
Agora yá fumos al Naso i ne l HOIJE stá la procisson para tu beres. I tamien la feira de l die atrás culas cuncertinas.
Quando screbi l testo de las arribas staba miesmo a ber que quedabas ambejosa de nun poder ir tamien.
Bá, mira pals mostaqueles que you bou a comer un.
Yá sabes que nun perdo ua palabra de las que scribes, tamien sáben cumo ls mostaqueles.
Oubrigado pul comentário i un beisico, inda que you nun seia mui beisoqueiro.
Parece que staba a screbir ua carta para l Brasil, cumo fazie quando andaba ne l coleijo.

Almendra

Adelaide Monteiro disse...

Hei Almendra:
Pena por dues rezones nun tenerdes ido a la Speciosa. Tamien you tube ua apendecite quando Rui tenie dous meses i tamein l lheite se fui. Tube muita pena por nun l poder dar la teta até ser grandico. L miu tiu tratou bien de ls dous ne ls treze dies que stube ne l spital.

Moscateles!!!Ui moscateles!!! Ador ubas i babo-me solo de pensar nesses moscateles de l retrato. Fui al Mini Précio i merquei ubas de la quelor de l moscatel, daquilhas de bagones mui grandes. Falta-l l doce i l oulor i sobra-l la casca que ye dura que nien piorno.
Bá Almendra,bai-mos mandando cousas dende al menos que mos fágan medrar l´auga na boca.

Beisicos,

Delaide

ACangueiro disse...

Grande fuorça tenen las palabras i quando son ditas/scritas nesta lhéngua i puostas a correr cun la lhebeza de l aire, l piar de l moucho, l cantar de cotobies, l relampar de diamantes, la musica de Beethowven, queda un ancantando i l desancanto bai nunca se çfazerá... las tues palabras cheiran i saben a muscateles de las arribas...

un beiso
antonho

Adelaide Monteiro disse...

Ui moscateles, ui palabras que sáben a moscatel!
Buona pinga bamos a fazer cun tanta palabra!...

bs

delaide

AF disse...

Bien haias Delaide pulas tues palabras, adonde tamien fala l'amisade.
Mira a ber se nun me stragas cun tanto agabon. L mais amportante ye que somos muitos i tenemos que ser muitos mais.

beisicos
A.