03/09/10

La salida


Sento-me ne l chano, doce cumo miel
Camino-te çcalça, sentindo tue piel
Bestida de nubrinas, de benairos çpida
Sinto-te por drento, choro-te na çpedida.

Stendo ls mius braços nun abraço einfindo
I assi quedo, pensando quedar cuntigo.
Ah, se tu soubiras l que me duel l peito
Quando me bou, siempre deste jeito!

Mas hei-de bolber, pormeto-te i juro
Para ancostar l barco an porto siguro.
Dedos cruzados beiso, selando la pormessa
Para que me esperes, me abraces sien priessa.

Ah, tierra querida se me quejisses tanto
Quanto you te quiero, i te deixo an pranto
Prendies-me ua lhançada, a la argolha de la bida
Nun me deixabas ir i dabas-me guarida!


3 comentários:

Abelhon disse...

Cumo te puodes çpedir dalgo que fai parte de ti?! Ye cumo un beneiro adonde cuorre l manantial que te mata la sede de paç.

un chi
A.

Adelaide Monteiro disse...

Ye berdade, tenes rezon,,,mas assi i todo,ye partida física.

Un chi
A.

Adelaide Monteiro disse...

Çqueciu-se-me de te dezir que este poema fui feito na piel dua amiga que stá an Fráncia a quien l custa muito salir. Uns dies antes yá chora i me diç que ne ls pormeiros dies quando alhá chega l custa muito a registir, que gostaba de poder fazer eiqui la bida, etc. etc.

outro chi,

A.