24/12/09

La calma de las bísporas


Retratos "ancuntrados" an: viladeruivaes.blogs.sapo.pt

Mirai, al buosso redor, la calma que bai chegando pouco a pouco. Mais algun reboliço al redor de ls quemércios, hai siempre ls atrasados, mas esses stan chenos de priessa i ban-se lhougo. Ls carros ampeçan a stacionar, las rues a zbaziar-se. La giente nun se abriga solo de l friu. L Chave d’Ouro sconde ls aquestumados, cumo ua outra família que nun se quiere separar i you antendo-los... Pra mais, ls amigos que se ancóntran por esse Pertual fuora, stan ende, Fidalgo, Zé, Cristo…cumo ls reis magos, besítan cun oufrendas Camilo (dunho de l café)… mais un i yá bamos, hoije sinto ua alegrie çfrente, nun me duole nada, nun tengo porblemas! Las ties an casa fáien ls últimos porparos, ls últimos ambrulhos, pénsan las últimas respunsablidades de la duonha de casa … outros nun fáien nin ua cousa nin outra. Spéran. Todos. Nun sáben todos l que spéran. Ua cunsoada? Ancontros familiares? Un nacimento? Mira, isso mesmo mais parece la calma que reina nun quarto quando se spera un garotico. Hai ne l aire cumo ua mistura de alegrie i ansiedade. Ternura. Esta calma, que apaga ls porblemas anquanto se acénden las belas, ls garotos que spéran ampacientes, ls mais solitários que mergúlhan ne l miedo de ficar demasiado solos nesta nuite… ye l Natal que bai chegando. Sinte-se que, durante alguas horas, haberá menos zantendimentos, menos giente lhuitará.
Ye la trégua durante um cachico…
Adriano Valadar

2 comentários:

franciscobelharino disse...

Buonas tardes amigo Tortulhas,

Faziste bien poner an Mirandés este guapo testo de Adriano Valadar.

Un abraço i un anho de 2010 cheno de cousas buonas,
Francisco
PS- Tenemos que ampeçar a pensar ne l terceiro ancuontro, data i todo l restro.

francisca carvalhal disse...

Buanas tardes Tortulhas,
ancantou-me l testo, mas ls Persépios son ua cousa tan guapa i son la proba que ye nas cousas simples que stá l melhor de la bida.
Abraço
Francisca