16/12/09

Dar




Nesta temporada de Natal i Anho Nuobo ye quando las pessonas s’antólhan mais por cousas nuobas, guapas i caras, l mais deilhas para dar als outros, l que só queda bien.
Dar ye i siempre fui un géstio nobre, nien que seia só ua palabra d’ánimo, un cunseilho, ua cousa simpres i de pouco balor, stá ne l modo cumo se dá l berdadeiro segneficado.
Agarrado al ato de dar debe star siempre algue mais que amostrar que se cumpre un questume, se fai porque ye tradiçon an tiempo de Natal, se fai porque ls outros l fázen, porque queda bien als uolhos de ls amigos i coincidos, porque dando tamien se recibe, porque se dir quedo nas buonas gráçias dun xefe ou doutor que apuis yá puode antercedir quando percisar.
Mas para alhá de ser ua temporada que todo mos antima a tener mais mimos i mesuras culs outros i culs que mais percísan, cousas que se debie fazer l anho anteiro, tamien ye bien própia dun resbalar a querer i mercar l que nun se percisa, aqueilho que mos amostrán pula fantasie de ser moderno i pimpon i nun pul necáiro. Para nun falar de muitas bezes séren dun précio que lhieba l que se ten i l que nun se ten.
Muito se fala neste tiempo an armandade, eigualdade, partilha culs mais necitados steian a pie de nós ou nó, mas las palabras lhieba-las l aire, la grande necidade que hai ye d’ansinar i eiducar, ansinar buns questumes, buonas práticas culs outros, haber mais respeito, eiducaçon, hounestidade, esta temporada ye bien própia, nun quiero dezir que las outras nun l séian, para dar l eisemplo. Ansinar ye la palabra cierta, dando l eisemplo als mais nuobos a nun çperdiçar i ajudar-los a ancuntrar l balor de dar, pulas sues bidas afuora muito ban a percisar.
Muitas cousas que agora se dán até stan znudas de balores, porque son berdadeiras monedas de troca “se fazires ou tubires isto pul Natal ganhas aqueilho” , isto nun ten balor nanhun, ye tierra mal arada, mal bai l campo de ls sentimientos, d’amor quando se trabalha cun pormessas.
Mas para alhá de las maugas que ancuntre, la fiesta de Natal, la fiesta de l nacimiento, l segneficado que mos ambuolbe merece siempre un sfuoço para dar, para que la fiesta de la renobaçon nun resbale an mais un die cumo ls demais.
Un Santo Natal, muita paç, alegrie, i que la gana de screbir nunca falte para to la quadrilha de las Frolesmirandesas i sous familiares, son ls mius deseios.

1 comentário:

Isilda disse...

Amigo Faustino!

Tamien para bós i la buossa familia un Santo Natal cun muita paç i alegrie.
Buonas Fiestas pa todos

Un Abraço

Isilda