08/07/07

Ls angenheiros de l camboio

*



Que quando mos lhebórun l camboio de Dues Eigreijas fui ua amoladela baliente todos stamos fartos de saber.
L que muitos nun sáben ye que pra alguns pobos de Miranda la amoladela ampeçou inda antes de l camboio apitar nestas Tierras. Yá bos cunto:
Oubi-le muita beç a miu abó, un de ls de l retrato, que staba treminado l cambóio tamien chegar a la Bila (cumo al tiempo solo habie ua bila, la giente deiqui nun dezie Bumioso, bundaba dezir bila i yá se antendie).
Diç que tamien passaba an San Pedro i an las Minas de Santo Adrian, nesse tiempo inda a scachar piedra cun fuorça.
Buono, you nun sei l que hai de berdade nisto. L que si ye berdade – bei-se ne l retrato – ye que inda andebírun porqui muitos angenheiros a sacar medidas i a botar ls bintes por adonde habie de passar la lhinha. Diç que benie a dreito de Dues Eigreijas, passaba an San Pedro al fondo de la Rezina, Cubo, Ordaç, Senhora de l Resairo/Santo Adrian i ala pa la Bila.
You nun sei se naquel tiempo yá andában ls ratos cabrera porqui, mas se nun fui por bias de ls ratos, cumoquiera que debrebe arranjórun outra çculpa pa ber de mos fazer la çfeita i l camboio se quedar a mei camino.
Assi i todo, eiqui queda l juntouro de angenheiros, de mistura cun ls maiorales de San Pedro, a la puorta de la taberna de l Canastra, apuis de más un die de canseiras a saltar paredes pul termo.
A ber quien ye agora l que se astrebe a dezir que San Pedro ye un pobico que nun cheira nien fede, tenendo estas amportanças todas, tan angorbatadas i tan anchapeladas, nas scaleiras de la taberna!...

4 comentários:

AF disse...

Mira, amigo Tortulhas,
que San Pedro era un pobo que mandaba respeito yá muito tiempo que l sabie;
que esses tius son angenheiros, si ténen calantriç;
que stan a la puorta de la taberna de l Canastra, tamien faç sentido;

agora que benírun de andar pul termo a saltar paredes i barrancos para ber por adonde iba a passar l camboio pa la bila, essa nun sei se me finte, que stan mui apilarados i esso todo. Tu que me cuntas...!? Nun haberá sido tue bó que fizo l serbício todo el solico? I nun mos dizes qual ye esse tou abó?
Un abraço i dius te l pague por retraticos tan pimpones que eiqui trais i...cun stória.

AF disse...

Squeciu-se-me de preguntar i por esso acá tornei:
- de que anho ye l retratico?

Tortulhas disse...

Caro porsor Amadeu,
Agardeço-bos, outra beç,las buossas buonas palabras de siempre!

Cumoquiera que si teneis rezon, que ls tius nun ténen pelaige de haber andado pul termo, quanto más a saltar paredes...
Miu abó ye l de la gorrica i cun un bigotico spetado a la sobela. Se arreparardes, ye l porsor daquel retrato de ls garoticos a la puorta de la scuola. Buono, eiqui un cacho más nuobo!
Diç mie mai que l retrato ha de ser ende puls anhos 20, l anho al cierto nun l sabe.
Solo más ua cousa:
you nun sei se l conheceis, mas hai un blog que pon cousas an Mirandés muita beç i que peç tener mui buona buntade cun la lhéngua.You yá quantá que dou por alhá uas buoltas. Lhembrou-se-me que, calhando, tamien podiedes poner eiqui l "caleijo" pa chegar alhá.
Ye www.braganzonia.blogspot.com i se furdes al die 27 de Junho ten cousas subre bós!
Un abraço

AF disse...

Oubrigado puls sclarecimientos, amigo Tortulhas. I fui un gusto coincer a tou abó, que era un tiu bien apilarado. Parabienes. Se inda fura bibo pula cierta muito teneriemos que falar de bigotes, que beio tamien era antendido de l assunto.
Mira, yá deixei ua sanja pa l blog braganzónia... i tal, que por adonde tu andas solo puode ser cousa buona i fui alhá i bi que si... i todo. Oubrigado.