29/10/13

Eimigrar outra beç ?! A prazo ye la ruína dun paíç !





26 de márcio de 2012, Miguel Sousa Tavares ne l canal SIC comentando l’atualidade…

"... L'eimigraçon d'hoije nun ten cumparaçon cula eimigraçon de ls anhos 60. Nanhue! I por esso aquel secretairo de stado que tubo aqueilha frase que you acho qu'el deberie de haber sido demetido pula ansensibelidade total que rebelou, que ls moços deberien de salir de la sue zona de cunfuorto, de zamprego, eimigrar i mandar debisas pa l Paíç, you acho, antre outras cousas, qu'el nun sabie de l que ye que staba a falar porque la giraçon qu'eimigrou ne ls anhos 60 de l seclo passado, la geraçon de la «valise en carton» de la Linda de Suza que se iba ambora i solo querie poupar denheiro para fazer ua casa na aldé i tornar i todo, yá nun ye la giraçon d'hoije. Hoije quien eimigrar yá nun torna. I antonce nós que yá tenemos un problema demográfico grabíssemo, somos l segundo paíç de l mundo cun menor taxa de natalidade, nun stamos a sustituir giraçones. Se estes 35% de moços (zampregados) se fússen ambora todos, quien ye qu'iba  a aguantar la Sigurança Social ?  Quien ye qu'iba a pagar las pensones de reforma als outros que quédan? Eimígran ls moços i quédan ls bielhos por cuonta de l Stado?! Esso nun ten beabilidade nanhue! … Pertual (tal cumo la Irlanda) yá fui un paíç debastado pulas bagas d'eimigraçon. Por esso oubir un membro de l gobierno apersentar l'eimigraçon cumo ua soluçon pals moços, you acho que ye ua loucura! Nun stan a pensar nas cousas cumo eilhas son… A prazo esto ye la ruína dun paíç !... "

3 comentários:

leonardo antao disse...

Buonas nuites Ana Marie,

Las questones que deixeste neste antressante testo mostran que percisamos de melhores gobernantes qu'estes “Nun stan a pensar nas cousas cumo eilhas son… A prazo esto ye la ruína dun paíç !” cumo bós bien screbistes.

Percisamos de respunsabelizar ls gobernantes por aqueilho que dízen i fázen, nun solo cumo medida de bun senso, mas subretodo cumo maneira de podermos atrair giente mais cumpetente i mais hounesta pa la gobernaçon de l nuosso stimado Pertual.

Un abraço,
Leonardo

Ana disse...

Buonas tardes, Leonardo,

Zde márcio de l anho passado, l mundo inda dou muitas buoltas; bonda pensarmos an todas las manifestaçones que houbo i inda hai ne l Brasil, un de ls países mais einegualitários de l mundo. Ua pena !

Assústan tamien ciertas amboras cumo aqueilhas que dízen que bai a cuntinuar la zertificaçon de l anterior, an Pertual: nas Beiras i an Trás-ls-Montes...

Ye Outonho i quando chega l fin de l die ye melhor nun pensar an ciertas cousas. L recunfuorto que podemos tener: la certeza que siempre venerán nuobas Primaberas.

Um abraço para bós tamien

leonardo antao disse...

Buonas nuites Ana Marie,

A mi tamien m’assústa la zertificaçon Trás-ls-Montes, a ampeçar por Zenízio, adonde custatei, nestes dous radadeiros anhos qu'acumpanhei i colaborei ne l Peditório pa la fiesta de Berano, que na maior parte de las casas solo biben pessonas mui bielhas.

Para mie surpresa, quaije todos ls bielhos de Zenízio trabalhan bastante na agricultura cumo lhabradores, criadores de bacas mirandesas, de canhonas i na florestaçon de tierras.

L que me párte l coraçon ye nun ber de la parte de ls gobernantes medidas de cumbate a essa zertificaçon i d'apoio a la mantençon de l'atebidade agrícola, qu'eibiten la cuntinaçon dessa zertificaçon.

Un abraço,
Leonardo