Na punta de ls bersos

 

Éran altas madrugadas

i la nuite tremie frie

nas tues manos i de las mies

un cuorpo an cachoneira

feita cielo decie.

 

Ls dedos mexien

sigurando la nuite
madrugada afuora

i al rumper  l´ourora

ls dedos cansados

benedezien l die.

 

Assomaba l die
na punta de ls bersos

 i ls dedos trabiessos
cumo que a lebitar

alhebantában las streilhas

que, pressentindo l die

ne l cielo arreculhien

cerrában ls uolhos
para s´ir a deitar.

 

Drumien-se  las streilhas

mas siempre riacendien…

 

Porpáran-se madrugadas
na punta de ls dedos,

i spértan las streilhas
ne l sou relhampar

i na punta de ls bersos

drume-se la nuite

ampuxando ls dedos

para sou bersiar.

 

I la nuite manten-se ne l berso

até l sol s´amostrar.