22/10/13

Las mies dúbedas

 
 
Daprender por ber

Todos nós l sabemos, que quando somos pequeinhos, quando stamos a medrar i a çpertar pa las cousas de bida, un de ls modos mais completos para fazer la daprendizaige ye bendo fazer, assi sendo l bun eisemplo ye eimitado, tal qual l malo ye arremedado.

Mesmo que you nun tenga toda la certeza, mas isso sou you, que de hai algun tiempo a esta parte nalguas cousas las dúbedas son muitas, cuntino a acreditar que nada debemos scunder, amouchar als jobes an special als de l miu paíç, eilhes son mercedores de saber todo, de l que se passa de buono i de malo acá i alhá fuora (strangeiro). Quien me dera a mi tener sabido todo quando era jobe (hai 50 anhos datrás), nun tenie medrado na scorridon, n’eignoráncia cultural, nesse tiempo (solo me dei cunta mais tarde) todo era scundido, nunca me fui amostrado mais nada que nun fusse l queilhes querien (regime).

Por esso ye que hoije las dúbedas son muitas, se será buono amostrar todo, neste mundo abançado, zambolbido i çpierto, adonde se amostra todo, de buono i de malo, adonde l’anformaçon, las amboras d’acá i de fuora chégan nun sfregante, mais debrebe que ls suonhos.

Tamien sei que l poder de scuolha debe ser un trunfo na bida, i esso solo se ten se l conhecimento fur cumpleto, assi sendo todo debemos fazer para que ls jobes téngan esse trunfo na sues manos i esso solo l ténen se nada fur bedado nien scundido.

Mas, i siempre l mas, será buono passar nas nuossas telbisones las nuobas de la bioléncia cun armas de guerra que se passa nas scuolas de l’América?

Cumo l dixe, nun tengo la certeza, se se debe amostrar estas cousas nas telbisones. Porque essas cousas (armas, bioléncia, muortes) nun son cumo nabalhas (facas), nua nabalha inda podemos dezir i purparar un jobe, dezindo-le que dun lhado corta, doutro nó.



Sem comentários: