14/05/12

Podie haber mais houmildade


Son 21 horas e 8 minutos; uma hora mais que an Pertual. Decidi ber ou pul menos ampeçar a ber l telejornal hoije na RTP hai uns minutos. Ora yá faç 8 minutos que ye la mesma pessona que stá a falar. Un tal Paulo Bento que fala subre futebol. Mas l que ye que m’antressa a mi l futebol ? Nada ou quaije nada! Mas parece que hai quien me querga oubregar a aguantar esses 8 minutos… Mas nun ye un programa specializado an çporto l telejornal i inda menos an anformaçones de carátele futebolístico, puis nó ?

Lhougo a seguir, depuis desses 8 minutos que parecie que nunca mais acabában, todas las anformaçones stan agora focalizadas subre l que se stá a passar na Grécia. Claro que esses dados son amportantes mas será que son mais amportantes que todo aqueilho que se puode passar tamien an Pertual ? Era para tener amboras subre Pertual que you ampecei a ber la RTP hoije….

Cumo ye na Anternet que stou a tentar captar esse canal pertués, la recepçon ye regularmente anterrumpida i deixo durante bários segundos de oubir l resto de l noticiário. Mas apercebi-me dua cousa. Depuis de la Grécia, ye subre la França que fázen agora comentairos ls jornalistas de la RTP, mais percisamente subre l protocolo que bai a ser ousado manhana para celebrar la tomada de posse de Hollande.

Finalmente só a las 21h20 (Son ende las 20h20) ye que ampeçan a ser dadas las purmeiras anformaçones subre l que se passou hoije ne l Paíç i que puoden ou deberien, penso you, antressar la mais grande parte de ls Pertueses.

Puis esta maneira de ampeçar l telejornal dá que pensar ! Nun será la proba que stamos delantre dun paíç dominado ou por questones secundairas (neste caso l futebol porque nun ye un assunto de purmeiro plano a nun ser para uns quantos) ou por assuntos que ténen a ber eissencialmente cul Strangeiro i nó propriamente cun Pertual ?

I que pensar tamien de ls jornalistas que particípan na eilaboraçon i na organizaçon desse telejornal na RTP ? Bonda oubir l ton cun que fálan alguns i alguas tamien para perceber que la respunsabilidade tamien ye deilhes. Podie haber mais houmildade na maneira cumo se sprímen perante amboras que stan loinge an ciertos casos de trazer felcidade imediata para todos ou son mais preocupantes na realidade que outra cousa… Mas you l que sinto ye subretodo cumo ua outosatisfaçon nessas bozes… essas bozes que chégan de loinge ou pul cuntrairo apenas de l outro lhado desta jinela que ye l’Anternet… I ye por esso que yá faç uns minutos que acabei por decidir cortar la ligaçon cun esse programa.

Mais quiero cuncentrar-me subre l que stou a dezir... dezir i tamien pensar. 



8 comentários:

leonardo antao disse...
Este comentário foi removido pelo autor.
leonardo antao disse...

Buonas nuites Ana Maria,

Bós sabeis bien que muitos pertueses gustan de futebol (de Cristiano Ronaldo, de Mourinho,..), pul que se cumprende l metan ne ls purmeiros 8 minutos d'anformaçones.
L que se stá a passar na Grécia i na Fráncia tamien antressa a muita giente, tanto ó mais do que l que se passa an Pertual. Assi sendo, cumprendo l'hierarquizaçon de las amboras deste teleijornal na RTP.

Un abraço.
Leonardo

Ana disse...

Essa hierarquizaçon, Leonardo, mostra bien la predomináncia eisercida pul futebol an Pertual. Bien mais que nun paíç cumo la França por eisemplo.
Mas la mie pregunta ye mui simples : será assi i todo que toda la giente joga futebol an Pertual al punto de justificar ua hierarquizaçon tan flagrante nun programa cumo l telejornal ?
Sabeis bien que nó. Ye por esso que acho pessonalmente mui suspeito amponer a ua populaçon anteira la supremacie duma modalidade sportiba bien determida atrás de la qual cumo sabeis tamien hai antresses financeiros eibidentes. Spero por eisemplo que nun bos tenga scapado que esses uito minutos téngan tamien serbido para fazer publicidade de l einício até al fin antre outras cousas a un determinado banco…
I naide se queixa ? Todos stan mais que satisfeitos ?... porque ban a ber correr uns quantos rapazotes daqui a uns dies atrás dua bola i claro cumo nun podie deixar de ser... atrás duns buns muntones de euros tamien, quier dezir : l que muitos nunca poderemos ganhar até nua bida anteira an ciertos ou até muitos casos ?!
I l fisco, Leonardo – séiamos tamien un pouco curjidosos i atentos ! - cunsegue cuntrolar a sério todas essas somas de denheiro, nun paíç adonde hai cada beç mais zamprego i pobreza tamien anquanto outros puoden ganhar an poucos dies ou meses, i an toda la legalidade, salários i somas de denheiro tan eisageradamente eilebados que até son – se pensarmos bien - dua andecéncia total ?
Será berdade, Leonardo, que l fisco cunsegue cuntrolar esso todo cumo debie de ser ?
Sabeis que dubido seriamente que seia berdade.

leonardo antao disse...
Este comentário foi removido pelo autor.
leonardo antao disse...
Este comentário foi removido pelo autor.
leonardo antao disse...

Buonas nuites Ana Maria,

Ye mie oupenion que se justifica l futebol de la Seleçon Nacional seia hierarquizado cun alta amportança para un porgrama cumo l teleijornal, porque hai muitos amantes de l çporto i subretodo por aqueilho que bós bien screbistes “hai antresses financeiros eibidentes”…. “salairos i somas de denheiro tan eisageradamente eilhebados qu'até son – se pensarmos bien - dua andecéncia total”.

Nun acradito que “l fisco cunsiga cuntrolar esso to cumo debie de ser”.

Ye tamien de salientar Ana Maria, l fato desta modadlidade çportiba, l futebol, ser un de ls maiores mobimientos associatibos de l nuosso Paíç, de poder trasbersal (cultural, çportibo i social), qu'assenta i ancentiba l boluntariado i cuntribui pa la balorizaçon cultural, cíbica de las populaçones i de l'amisade d'einorme relebáncia pa las quemunidades lhocales.

De grande amportança ye tamien l fato de l futebol, melhor, ls Clubes de futebol, cuntribuiren para cumbater la scluson social, para mantener la coeson nacional, anraizada na regional (biba ó Porto! carago!) i, mui amportante, para mantener l Paíç mais solidairo.

Todo esto se berifica, an special ne ls pequeinhos Clubes, cumo l miu Canários de la Charneca de la Caparica, adonde hai muitos boluntairos (carolas) i muita mocidade ne ls Jubenis i einiciados, que trabalhan por amor a la camisola.

Un abraço,
Leonardo

Ana disse...

Leonardo,

Torno a dezir.
Por mais amportante que seia l papel que alguns cumo bós atribuen a esse çporto, a partir de l momento an que só ua parte de la populaçon joga futebol i nó la populaçon anteira, nada justifica que póngan i ampóngan esse tema lhougo ne l ampeço dun telejornal i durante tanto tiempo. Hai assuntos bien mais amportantes, mais sérios i eissenciales que simpresmente un campeonato de futebol, seia el ouropeu ou até mundial. I hoje, sien dúbeda ningua, mais inda que nunca !

Cumprimentos

leonardo antao disse...

Buonas nuites Ana Maria,

Nun stou anteiramente d'acuordo cun bós. L'amportança de ls assuntos barie de persona para persona, cumo bós bien sabeis, i stá dependente de l prazer que dá a las personas.

A este respeito, relembro-bos l que screbiu Eipicuro ne l'anho 340 AC:
- “nun hai prazer que seia malo an si mesmo. L que ye malo son las zagradables cunsequéncias que puoden resultar se nun se usa la cabeça quando se decide que prazeres prosseguir i quales a eibitar”.

Un abraço,
Leonardo