17/05/12

Toques de sinos na Terra de Miranda






Libro de Mário Correia apersentado an Lisboua, na Feira de l Lhibro

 Tocórun las campanas na Feira de l lhibro an Lisboua a fazer todos ls que íban passando bolber l cachaço para poner l oubido i ls uolhos a modos de mirar i scuitar d'adonde l sonido salie. A  mi más me parecie star na mie aldé a oubir tocar a repiquete de batizado.

Cuntínan las campanas a tocar i ende aparece l Secretairo de Stado de la Cultura, Fracisco José Viegas Viegas i l 1º Menistro, Passos Coelho, cumpriméntan l eiditor, l apresentador i l outor i  dando le a este ls parabines pula obra, apuis se çpedindo i cuntinando feira arriba. Cálhan-se las campanas i apresenta-se l lhibro cun ua mesa cumpuosta pul  Dr. António Batista Lopes, eiditor de la Âncora Editora, Dr. Amadeu Ferreira  apresentador i Mário Correia outor de l  lhibro "TOQUES de SINOS na TERRA de MIRANDA".
Ampeça l eiditor por dezir cumo l lhibro apareciu, nun cutesto de apoio al Centro de Música Tracional Sons da Terra, i que era ua grande honra apersentar l lhibro cumo aquel.  Amadeu Ferreia diç ser ua grande honra apresentar l lhibro de Mário Correia, home cimeiro na dibulgaçon de la cultura popular, an special de la Cultura Mirandesa, que sien el nun serie la mesma. Quanto al lhibro dixo que solo un home cun muita sensibilidade para se lhembrar de screbir un lhibro i grabar un CD cun toques de campanas. Muitos de ls toques registrados ne l CD  yá nun son tocados i muitas de las pessonas que tocóran estes toques tamien yá nun fazen parte de los bibos.

 Amadeu Ferreira, falando de la spriença del cun toques de campanhas, diç que naciu i creciu a oubir tocar las campanas. Dixo que ua pessona tenie l perbileijo de tener las campanas a tocar solo para eilha al menos dues bezes: quando se batizaba i quando se morrie.
Quando l apresentador ampeça a falar de l toque a truniadas, bieno-me a la mimória mi mai, de puorta cerrada i postigo solo un cachico abierto cula candena de azeite acesa, rezaba de zinolhos a Santa Bárbela anquento las campanas tocában sonidos rasgados cun las priessas de botar la truniada pa l çcampado. Diç Amadeu Ferreira que este toque i tamien l toque a rebate ténen funçones mágicas. Todo l pobo se ancamina para la praça a saber la rezon de l toque, podendo ser fuogo ou outra calamidade

Cul toque de las trindades la jolga acababa i todos ls garoticos que stubíssen na rue bolbiean a casa i ai del que cuntinasse na rue... Falou inda de l toque de las almas i de ls miedos que cun el traie tamien de quando se cantában las almas a la nuite.
 Mário Correia, l outor, apuis de oubir  Amadeu Ferreira diç que pouco le sobra para  acrecentar. Mas siempre acrecenta que l mais de ls toques fúran grabados quando las cousas acuntecíran i que solo ls toquesde las troniadas fúran tocados d'apropósito.  Muita desta paisage sonora se foi perdendo i ls bielhos tocadores yá nun s'astríben a chubir las scaleiras de ls campanairos.

Ten este lhibro i l CD que lo acumpanha l grande balor de mos amostrar tiempos nun mui çtantes i que se nun fosse Mário Correia muitas destas mimórias habian de se perder.
Diç l Senhor Bispo de Bregáncia, D. José Cordeiro, ne l perfácio: "Quando ouvimos os sinos, sentimos a vastidão. Quando eles oscilam, na torre da Concatedral ou das igrejas de Miranda, podemos exlamar: «como é grande o mundo» dizem os sinos, «assim pleno de saudade...Deus chama...Só Nele está a paz» (R.Guardini).

Apuis de star na apresentaçon de l lhibro TOQUES de SINOS na TERRA de MIRANDA de Mário Correia solo puodo dezir: bien haia por mos amostrar l que somos i mos lhembrar a mimória de todos ls que yá mos deixórun.

 

2 comentários:

leonardo antao disse...

Buonas nuites Antonho Cangueiro!

Ambora nun tubisse ouportunidade d'oubir i ber, d'acerca, las campanas na Feira de l lhibro an Lisboua, dou-bos ls mius parabienes por estes guapos retratos i eicelente ambora de dibulgaçon de l que se passou ne l salimiento de l lhibro "Toques de Sinos na Terra de Miranda".

Parabienes mui fuortes al outor de l lhibro, Mário Correia “home cimeiro na dibulgaçon de la cultura popular mirandesa”, parabienes al nuosso stimado apersentador Amadeu Ferreira i tamien a todos ls outros que cuntribuiran pa la rializaçon deste amportante salimiento, que fui mais ua buona houmenaige a la “mimória de todos ls que yá mos deixórun”, que muito cuntribui para oumentar l patrimonho cultural mirandés .

Un abraço,
Leonardo

"Scacição" disse...

Quedo cuntenta cun estas amboras!

Parabienes Mário Correia i bien haia!