08/05/12

BEILARINAS










 
Al ritmo de las gaitas de fuolhes, tambores i repasseados
ampeça la caminada: béilan cumo dengues.
Nun sei se ye pul ancanto de las arribas
que l'alegrie se zata i la lhéngua mirandesa
ten, por ende, tanta lhibardade i sonido.

L tiempo bieno d´aperpósito, abriu un scampado,
por bias de las deboçones a S. Juan de las Arribas.
Ua talanqueira an Bal D´Aila serbiu pa l matabicho
Apuis, cumo an piedras resbalinas
parecie que rebolábamos a caras al Douro
tranquilo i apertadico, bien ne l fondo de ls canhones.

Até  las duras fragas quédan dóndias cun las quelores de maio.
Lhembran-se-me  las guapas mantas de lhana d´oubeilha 
que, cun arte,  las tecedeiras amánhan ne ls sous telares.

Puls caminos lhúzen las scobas, tamien, beilarinas;
de maio, las reinas. Parécen cumbencidas
de que spántan ls males i l´anfierno de la bida.

Teresa Almeida

5 comentários:

ACangueiro disse...

palabras cun cherume de oulores de primabera i retratos de beiladores. Guapo Teresa!

Unknown disse...

Guapo ye pouco!
Pura arte de screbir!
Gustei Teresa.

leonardo antao disse...

Buonas nuites Teresa Almeida,

Esta buossa ambora ten frases i retratos ancantadores. Parabienes.

You daprendi na “scuola de la bida” que son ls pequeinhos acuntecimientos diairos cumo este que tornan la bida espetacular i que sustentan l buono relacionamiento antre las pessonas.

Un abraço.
Leonardo

Adelaide Monteiro disse...

Até las fragas quédan mais dóndias cun las quelores de Maio
Até la bida dura queda menos dura cun estas dóndias palabras...
Un beiso,


Delaide

Teresa Almeida disse...

Buonas nuites amigos
Antonho, Almendra, Delaide i Leonardo.

Quedei bien cuntentica cun las buossas amerosas palabras. Gustaran-me muito!
Bien háiades.

Beisicos.