01/05/12

Caminada al Castelo de Oleiros ou Castelo dos Leiros











Bempuosta, binte i nuobe d'abril de 2012. Nuobe horas. Las nubres spárban-se a cielo abierto i amanáçan auga. Mas çcampados i cielo azul tamien s’amostra. Seinhas que l sol puode zumbar i la chuba quedar-se para outro die. Digo buonos dies al miu bezino i dá mos dues de laraxa. Las campanas sóltan sonidos deloridos i badalhadas suoltas. Seinha de muorte. Tiu Ourácio, las campanas tócan a muortos, anton quien se morriu? Foi la mulhier de Tiu Nogueira. Paç a la sue alma. Silenço.

Anton, bamos a la caminada. Nó. Las mies piernas yá nun s’achégan a tan loije. Nós tenemos que mos ir achegando que ls ciclistas stan a salir i apuis son ls caminantes. Puis, buona caminada.

Cheguemos a Sto Cristo, hai que pagar la scriçon pa l almuorço. You nun trouxe denheiro. Tu sós siempre l mesmo.Tenes denheiro Manel, apuis you pago te.  Anquanto se faç l pagamento ls caminantes pónen-se a camino. Son por ende cien caminantes. Ls de la delantreira  yá íban a la Cruç de las Almas i nós ainda stábamos a salir.

Quando s’ampeça, todo mundo camina cun ganas de chegar purmeiro i para alcançar ls de la traseira tubímos que dar un cachico mais a las pantorrilhas. Arrimado al Cabeço d’Assumeda alhá agarremos alguns. Hai nomes bien pimpones. Assumeda! Algo que se mos amostra. La paisaige ten uas bistas anchas i  quando miramos a la nuossa dreita tierras de Spanha achégan-se al nuosso oulhar. Bamos mirando la prainada i sacando retratos. Nunca habira bisto tal: binha i penheiros. Al duonho, pula cierta, nun le dou para arrincar las cepas. Puso ls penheiros i assi bai fazendo labor als pinheiros i amanhando la binha.  Inda tenemos que caminar até chegar  al çtino de la caminada. La Junta de Freguesie, pormotora de la caminada, mandou fazer camisolas que ouferece a todos ls caminantes anscritos i alhá stá - Castelo de Oleiros. L ambestigador i scritor Amadeu Ferreira diç que l nome cierto de l chamadeiro serie Castelo dos Leiros i nó Castelo de Oleiros - Leiros (Castelo dos) antiga povoação pré-histórica. Tem sepulturas e pedras esculpidas. Aqui apareceu uma lápide funerária em mármore e uma estela discóide com as letras apagadas; povoado fortificado romanizado. Parece que ainda terá sido habitado na alta idade média. Talvez de Lareo>Lairo>Leiro: zona rochosa junto a um rio. De l lhatin glaretum (DCECH, glarea) -

Preguntei le a mais dua pessona de Bempuosta cumo dezien ls nomes de las ribeiras que cuorren a muntante i a juzante de l Castielho i todos me dezírun: ribeiro dos Leiros i ribeiro de Guímara.

Siempre caminar fui saludable i you fui d’aperpósito de Lisboua a Bempuosta para tornar a pisar l Castelo de Oleiros ou Castelo dos Leiros que, de nino, sien que mie mai soubisse, alhá habie ido a saber de l tesouro scundido. Tantos outros ninos apuis de mi alhá se fúrun na mesma busca. Que outros ninos haba para que ls suonhos alhá los demande.

La nuossa mimória ende stá bien biba, la caminada assi lo diç. An mimória de ls que de alhá mirórun l Riu i muitas lhuitas trabórun i sous ninos criórun, eiqui deixo un pedido al perjidente de la junta de freguesie, home sensible i lhuitador na perserbeçon de la mimória de las gientes de Bempuosta que faga ls possibles para que l que resta dessa nuossa mimória ainda se puoda cunserbar i mantener.

Quédan ls retratos que saquei i que haba salude para que l próssimo anho se faga outra caminada.

3 comentários:

Ana disse...

Só son ende las uito mas a mi yá me soube bien ampeçar ua buona parte desta manhana mirando estes buossos retratos i seguindo esta buossa caminada saludable por tierras de Bempuosta… cumo se alhá tamien stubíssemos. Só fáltan ls oulores a hierbas, flores, arbles i até tierra que alhá stan i siempre mos espéran para l’eimaginaçon mos lhebar eiternamente até alhá.

Buonas caminadas.

Ana Maria

Teresa Almeida disse...

Inda bien que beniste d´aperpósito de Lisboua a Bempuosta para mos amostrares estes guapos retratos de la caminada.
Sabes que tamien na "Assomada de Lagoaça" tenemos assi bistas guapíssemas, anchas, cun arribas i tierras de Spanha delantre.

Nun se m´admira, ye l mesmo riu.

Buonos dies Antonho.

Beisicos.

ACangueiro disse...

Ana i Teresa, assi mos arrimamos a tiempos i spacios que siempre mos arrolhan ls dies.