26/04/12

Riampeços



  Ye siempre possíble poner ua chaço
nun buraco dua meia
que mos amostraba l carcanhal 
a asparecé-se a ua batata;
dar uns pontos ne l buraco
que la unha mal cortada
fizo a la punta de la meia,
a assomar
cumo quien spreita la bezinança.

Nien siempre ls remendos resuolben
las necidades de ls passos.
A las bezes ye preciso riampeçar,
botar outra beç las malhas,
fazer l queirelo a la medida
para que passe no pie
i nun aperte
nien se caia de la pierna,
botar malhas a la panturrielha,
fazer ls minguados pa la canielha,
fazer la taloeira i ls minguados
pa l feitiu de l pie
para que ls dedos nun s´ancabriólen,
ou, alrobés,
l çapato nun s´éncha
cun panho de sobra.

Como an todo,
muita beç mais bal riampeçar
do que quedar a mancar
por bias l remendo
que mos maça,
mos fai delor
i ambassa
 l nuosso andar.

Hai renuobo
ne l riampeço de ls passos
cun meia acabada de fazer.
Bonda filo i arte
i apuis ousadie
para cun l cotobielho i la cuçpinha,
apagar muitos de ls zeinhos
na piedra de la bida.

3 comentários:

ACangueiro disse...

ende stá un guapo testo que nun son uns punticos ou minguados son chenos de cherume. Mais que ua panturrielha ou canielha ye ua meia anteira.

beisicos Delaide

Adelaide Monteiro disse...

Hai çmuostras de cosidos que mos fázen burras. Un chaço alebia, ua meia acabada de strenar dá-mos outro andar i ye un renuobo a l´alma, porque quando l pie duol nun hai nada que nun duola.
Fui ua buona liçon para quien quejir fazer sue maia anque inda aporbeite l talon que ye l que menos se rompe.

Un beisico, Antonho.


D.

Adelaide Monteiro disse...

Hai çmuostras de cosidos que mos fázen burras. Un chaço alebia, ua meia acabada de strenar dá-mos outro andar i ye un renuobo a l´alma, porque quando l pie duol nun hai nada que nun duola.
Fui ua buona liçon para quien quejir fazer sue maia anque inda aporbeite l talon que ye l que menos se rompe.

Un beisico, Antonho.


D.