03/04/12

Páscoa



L que ye que se faç inda hoije na altura de la Páscoa an países cumo Spanha, Pertual, Eitália, ciertos países de l’América Lhatina ou até nas Felipinas? Procissones, por bezes spetaculares para celebrar la paixon de Cristo i la sue ressureiçon…

L que ye la Páscoa an França cumo an quaije todos ls outros países ouropeus ? Alguas missas para ls mais praticantes mas procissones mui poucas para nun dezir quaije ninguas. You, por eisemplo, nunca me lhembro de haber bisto nien ua an França i bai a fazer agora mais de 40 anhos ; a nun ser talbeç an Paris, ne l bairro de Montmartre segundo me parece, mas na telbison quando calha ber essas eimages ne l telejornal. Ua procisson (essa que se faç, acho, inda ne ls dies d’hoije) que junta na realidade solo ua ínfima parte de la populaçon dessa cidade de 10 melhones de habitantes cuntando tamien ls arredores, ou mesmo de la populaçon desse paíç. Mas nun sou you que me bou a queixar; de modo giral nun gusto dessas procissones.

Assi i todo para que un se cumbença que bai mesmo a ser l que cháman la Páscoa yá nun falta por ende muntones de uobos de choclate, pitas i coneilhos de choclate !

I quando un ten fame, nun diç que nó i sien que haba oubregatoriamente eisageraçon. Para quei eisageraçon ?!


3 comentários:

Almendra disse...

..."Assi i todo para que un se cumbença que bai mesmo a ser l que cháman la Páscoa yá nun falta por ende muntones de uobos de choclate, pitas i coneilhos de choclate!"...
Mas quien quier cumbencir alguien?
I adonde hai essas cousas? An Sendin,nó.
Esso son cousas de ls nuobos ricos i anteletuales de las cidades.
L pobo, tomara tener que comer!

leonardo antao disse...

Buonas nuites Ana Marie,

Gusto de ber la guapa arble carregada de guapos balones i de bos ber a falar de Páscoa, prossiçones, missas, uobos de choclate, pitas, coneilhos de choclate.
Solo faltou falar-mos de folares.

Todo esto mostra que stais a bibir la Páscoa, ouferecendo-mos un pouco de la buossa cultura, que ne ls bai ajudando a custruir la família Froles i a bibir la amizade i la paç pascal.

Ls mius sinceros botos dua Páscoa Feliç para bós Ana Marie i para todos ls buossos fameliares i amigos.
Leonardo

Ana disse...

Buonos dies, Primo Jesé,
Buonos dies, Leonardo,

Hai yá un bun par d’anhos li un remance brasileiro, Memórias dun Sargento de Milícias, an que a cierta altura aparcie ua eideia que nunca mais squeci zde anton. L’eideia que todas las fiestas son buonas a partir de l momento an que dan la possibilidade als membros dua família de se juntar i de passar alguns momentos felizes. I quando nun ye cula família que seia anton cun amigos, bezinos ou até, porque nó ?, cun pessonas que inda nun cunhecemos ou cunhecemos pouco.
Ye esso l mais amportante.
Quanto al folar, Leonardo, sabeis que un nun puode abusar tal i qual cumo cun l chocolate. Gusto de probar… mas un cachico só !
Senó l que ye que se passa ?
Un cuorre seriamente l risco de quedar rapidamente cua barriga que mais se parece a ua tinalha !!

I nesse aspeto, feliçmente, tengo ua médica que me splica l que ye preciso splicar… I para antender, nun ye preciso ser nien rico nien anteletual. Bonda ua pouca de sensibilidade i tamien d'anteligéncia.
Porque ye que neste mundo uns muorren de fame anquanto outros nunca se fártan de comer ?
Ye esso que stá mal !
Hai que saber cumo mudar essas cousas.
Mas la soluçon puode ser mais simpres do que parece.
Aceitando por eisemplo falar cun calma e sien agredir a naide.

Buona Páscoa anton… i bun folar. Mas claro cun moderaçon pelo menos ye essa la mie oupenion !