17/04/12

Cuncurso de canhonas raça Churra Galhega Mirandesa

Fui no sábado an Malhada, lhugar adonde ye la sede de la Associaçon de criadores deste ganado. Fui l 17.º cuncurso.
Las canhonas çfilaban cumo las misses na passerelle, cun grande naturalidade i sien que sous amos las tebíssen lhebado al barbeiro a ondiar mais l pelo ó al doutor para que l tirasse ou ponisse ls quartos mais delgados ó anchos. Eilhas son guapas i bien apersentables sien esses artefícios...
Ls criadores stában cadun mais concho que l outro por mostráren ls sous animales bien tratados i cada beç melhores, sigundo las palabras de la persidenta de l júri quando fui l´antrega de ls prémios na Sede de l´Associaçon Cultural de Malhadas, que, sigundo las palabras de la senhora Beriadora de la Cultura, Dra Anabela Terron, que çcursou cumo peixe a nadar n´auga, eilha que ye doutora beternária, "an tiempo de crise achou la Cámara por bien, an beç de taças, dá-se denheiro i sacos de raçon, que siempre ye ua ajuda".
Las pessonas íban sendo chamadas i para alhá d´un amblope na mano era-le puosto un saco de raçon al lhombo que nada era para quien cumo eilhes stá mais que aquestumado a cargá-los i mais inda astanho que cun la seca, las canhonas nun apanhaban nada ne l termo i le tenien que cargar cun l feno i las raçones.
Ua raça a ser bien perserbada por ser nuossa, ten ua chicha dun gusto cumpletamiente çfrente de qualquiera outra i que bien mos soubo ne l almuorço serbido antes de l´antrega de ls prémios. Para mi nun hai melhor que un guisadico de cordeiro ou ua costelhicas assadas i quemidas anriba l pan cun l´ajuda de"la palaçuola".
You i l miu tiu alhá stebimos, a cumbite de l nuosso amigo i cumpanheiro de studos an Miranda, Chico, mais coincido por Chico de Zenízio, anque el séia de Dues Eigreijas. Bien haia por isso. Anque yá mais anhos oubíramos sido cumbidados, nunca habie calhado star no Praino nesse die. Baliu la pena nun solo porque fui antressante mas tamien por habermos tornado a ber giente que agora ye criadora de animales desta raça i que nun biemos zde l tiempo de la scola.
Agora yá sabemos adonde hemos de mercar cordeiro de cunfiança.

Parabienes als pastores, als ourganizadores i a la Cámara por dar apoio nestas cousas de mantener l´outentecidade de l que ye nuosso.

4 comentários:

Unknown disse...

Gustei de la ambora i cun mais pena quedei por nun haber ido. You bou tols anhos i fago siempre un bideo i pongo ls retratos ne l HOIJE. Yá me perguntórun porque nun ponie nada este anho, por esso se tenes algun retrato pon eiqui, porque assi yá mando benir a ber.
Hai que amentar mais ne l canhono churro, porque cumo tu dizes, un guisadico ò uas costeleticas assadas nun quédan atrás de la puosta.
L Praino ye mi rico an todo, tenemos muito trabalho para l pormober an todos ls santidos. I todos nun somos demais.

Bj
Tiu Almendra

Adelaide Monteiro disse...

Almendra:
Nun lhebei máquina de retratos, nien bi a naide coincido que tirasse. Lembra-se-me que bou a percurara a Anabela, la Bereadora, a ber se hai modo de amanhar algun que decierto que alguyien de la Cámara tirou.

Bs,

Delaide

leonardo antao disse...
Este comentário foi removido pelo autor.
leonardo antao disse...

Buonas nuites Adelaide:

Gustei deste buosso testo, an special deste cachico “ua raça a ser bien perserbada por ser nuossa, ten ua chicha dun gusto cumpletamiente çfrente de qualquiera outra i que bien mos soubo ne l'almuorço serbido antes de l´antrega de ls prémios". Tamien para mi nun hai melhor “qu'un guisadico de cordeiro ó ua costelhicas assadas i quemidas anriba l pan cun l´ajuda de "la palaçuola"”.

Estes momientos fázen-me zanterrar mimórias de las preocupaçones que ls mius padres tenien culs ganados de canhonas, cul aprobeitamiento que fazien pa l stierco de tierras, cula sigurança de la corriça de la Tapada, cula çquila de la lhana, cula chicha tienra i mui gustosa i cula preserbaçon de la raça...

Ye lhoubable l trabalho de ls pastores, de ls ourganizadores i la de la Cámara an mantener l´outentecidade i la culidade desta eicelente raça de canhonas Churra Galhega Mirandesa, que mui cuntribui pa l prestigio de ls nuossos lhabradores i criadores de ganado mirandeses.

Un beisico,
Leonardo