08/02/14

Tenei la buondade de amesquinhar, por fabor



(Muito se ten falado sobre praxes na Comunicaçon Social, nas redes sociales i até ne l Froles l tema foi trazido por Ana. Deixo-bos eiqui uns cachicos de un testo de Ricardo Araújo Pereira, cheno de eironie, sobre l tema. Nun l traduzi todo, por esso deixo-bos eiqui la lhigaçon para quien l quejir ler: http://visao.sapo.pt/tenha-a-bondade-de-me-amesquinhar-por-favor=f768149#ixzz2sjrAdLRD)

Quando antrei na ounibersidade yera un moço assustado. Nun coincie la casa, nin ls métodos de trabalho, nin ls colegas. Percisaba, cumo ye eibidiente, de me antegrar. Mas ls mius colegas, cun ua crueldade que inda hoje nun squeço, tenien outros planos. Todo ampeçou ne ls purmeiros dies. Abordei un studante mais bielho e preguntei-le: "Puodes dezir-me adonde ye la biblioteca, por fabor?" Spero que el steia a ler este testo i se ambergonhe de l sufrimiento que me anfligiu. Respundiu-me: "Ye eilhi an friente, a la dreita." Fui ber i yera mesmo. An beç de me sfregar cun scrementos de animales ó de me oubrigar a rastejar, aqueilhe eidiota habie-me dado ua anformaçon cierta, cumo se you fuosse ua pessona eigual a el. You staba çpuosto a deixar que el nun quejisse screber-me na testa la palabra "Besta", mas nun podie admitir que me pribasse de ua anriquecedora speriéncia de bida, tratando-me como se you fuosse mesmo un ser houmano.

Fui atrás dele i diç que la conduta del yera ua bergonha. Que, se you nun fuosse houmilhado an público, tenerie muito menos heipóteses de me sentir parte daqueilha quemunidade. Que percisaba de cumbibir, para facilitar la mie antegraçon i que nanhun cumbíbio çpensa l' aplicaçon de uobos i farinha ne l pelo. El fugiu i passou l resto de l curso a eibitar-me.

Suonho cun ua sociedade de tal modo solidária e ansiosa por antegrar to la giente que este tipo de prática se torne quemun, nun solo na purmeira beç que se bai a l' ounibersidade, mas na purmeira beç que se bai a qualquier lhado. Quiero poder ir a un talho e oubir l talhante: "l senhor de la seinha binte i uito nunca beio acá, pues nó? Anton tirai las calças porque ides a fazer de cuonta que stais a fazer amor cun este lhombo de bitiela, anquanto l outros clientes bos ansultan."

Siempre que pienso sobre esta tema perciso mesmo de relaxar e de me sentir a la buontade. Ye l caso, agora. Bou pedir a alguien que me oubrigue a andar na rue bestido solo cun ua fralda i todo besuntado an graxa, a ber se çcuntraio.

Ricardo Araújo Pereira

1 comentário:

leonardo antao disse...

Buonos dies amigo Firmino!

Podie dezir que nun gusto de praxes, qu'acho l'eideia deprimente, que ls rituales ampuostos als calouros son biolentos i houmilhantes i “eimbecelidades pró-nazis”, porque:
- Ten grácia ansultar i anxobalhar ls calouros an público?
- Adonde acaba l porcesso d'houmilhaçon cunsentida?
- Nun stará esta praxe a criar un sprito de matilha, qu'alimenta i se alimenta de l'ampunidade?

Nun fui esta praxe rebaixante que you conheci hai 46 anhos i, por esso la cundeno fuortemente, tal cumo Ricardo Araújo Pereira i Ana Marie.

La praxe que you defendo, que ye tradiçon académica, ye la praxe que pretende antegrar ls calouros cun inofensibas brincadeiras i questones a que son submetidos para percurar demunstrar-les que la scessiba arrogáncia ye prejudicial na sue bida fetura.

La praxe que you defendo ansina ls balores sociales de siempre, cumo l respeito de l'hierarquie, que ajuda ls calouros a antegráren-se nua quemunidade ounibersitária.

Un abraço,
Leonardo