01/02/14

Praxes




Yá tube oucasion de l dezir inda hai poucos dies : nun hai « praxes » ounibersitairas ne l paíç adonde moro (la França) porque aqui essas práticas son proibidas i punidas até. 


I l que penso tamien ye que yá ye mais que tiempo que ls jobes pertueses steian mais bien anformados subre l que chegou tamien a representar, inda nun hai assi muito, la scuolha de la quelor negra na maneira de uns se bestíren, essa mesma percisamente  que usórun ls "Camisas Negras" de l’Eitália facista de Mussolini…


Ou naide nunca le splicou a esses jobes l que éran ls "Camisas Negras" ? Naide le acunselhou tampouco a ler estas poucas linhas por eisemplo, inda porriba ne ls tiempos de hoije an que raros son aqueilhes que nun ténen acesso a l’Anternete? Na Wikipédia, sien irmos mui loinge, l artigo subre ls « Camisas Negras », aqui:


" Sous ouniformes (ls de ls Camisas Negras) fúrun eimitados por outros que cumpartilhában de l'eideologie facista, cumo ls nazis almanes, que reserbórun l negro para guarda pessonal de Hitler (Schutzstaffel ó SS) i scolhírun las camisas pardas pa las SA (Sturmabteilung), de funçon similar a las camisas negras eitalianas..."


[An pertués: Seus uniformes (ls de ls Camisas Negras) foram imitados por outros que compartilhavam da ideologia fascista, como os nazis alemães, que reservaram o preto para guarda pessoal de Hitler (Schutzstaffel ou SS) e escolheram as camisas pardas para as SA (Sturmabteilung), de função similar às camisas negras italianas...]


I esto apenas ne l que diç respeito al uso dessa quelor…


Mas hai bozes feliçmente tamien an Pertual para chamar mais ua beç l'atençon subre un peligro que finalmente inda nun chegou a zaparcer… Mais ua rezon para cuntinuarmos atentos, mui atentos !  

13 comentários:

leonardo antao disse...

Buonas nuites Ana Marie!

You fui bítima de praxes mui biolentas ne l purmeiro anho de la Academie Melitar, mas reconheci mais tarde que la quaije totalidade de las praxadelas que lhebei fúrun ua forma d'antegraçon na mie carreira melitar i cuntribuíran muito para melhorar l'amisade, la deciplina i la camaradaige i l sprito de grupo i d'ounion culs mius camaradas mais bielhos.

Las praxadelas, an special las feitas cun sprito d'humor, de formaçon i de zanrascanço, mesmo cun algua houmilhaçon, ajudórun-me al lhongo de a mie bida académica i cuntribuíran para melhorar la mie forma física, la mie capacidade d'ancaixe i la mie andurance psicológica i moral.

L que cuntórun alguas alguas pequeinhas houmilhaçones que sofri? Cuntórun muito pa l miu cumportamiento, porque me ajudórun a renunciar a suonhos inebiriantes de l triunfo i a recoincer las bantaiges de l'houmildade.

De l que bebi, bi i oubi nestes radadeiros dies nas telebisones, muitas fúrun las cousas que me ampressionórun. Mas cuncordo cun muitas associaçones de studantes que manifestórun la sue cuncordáncia cula praxe, porque, zde que bien feita custitui, un aliçace pa l buono relacionamiento pessonal i coletibo de e ls studantes ounibersitairos.

Un abraço,
Leonardo

Ana disse...


L’houmelhaçon, Leonardo, repersenta un ato que an sociedades cebilizadas nun puode ser tolerado. Acho que la França cun essas cousas nun quijo andar cun meias medidas (cumo parece ser anfeliçmente l caso de Pertual!) i na mie oupenion acho que ye melhor assi. Nunca las praxes tal cumo eisisten ende an Pertual poderien eisistir hoije an França. Haberie críticas até nunca mais acabar ! De toda la orde !

Pul que antendi, las praxes an Pertual zambuolbírun-se hai uns anhos para acá al mesmo tiempo que oumentou l número de faculdades pribadas... Ye l caso de la Lusófona, nun ye ? Ora ende, parece que até ciertos eilementos de l Cunseilho de la Praxe úsan l título de « dux » que an eitaliano acabou por dar " Duce "... tal i qual cumo un cierto Mussolini ! Ye grabíssemo, Leonardo ! Que faculdade ye essa ?

leonardo antao disse...

Buonas nuites Ana Marie!

Nun conheço la forma de praxe de la Lhusófona. La praxe que you conheci baseaba-se an jogos, an cumbíbio, an amisade, an partilha de stórias i spriéncia i era feita para melhorar l'antegraçon de ls alunos i para trasmisson de balores, cumo l de l'hierarquia i de la deciplina, i l sprito d'eiquipa.

Aprecio Ana, la cumbiçon cun que bós defendeis la buossa oupenion.

Un arrochado abraço,
Leonardo

Ana disse...

Buonos dies, Leonardo,

La palabra "praxe" stá hoije mui conotada i nó oubregatoriamente de maneira posetiba.

L que ten que haber ne ls stablecimientos de ansino ye un cunjunto de regras, un regulamiento. Fuora desso, nun ampide que haba associaçones de studantes mas cun práticas i oubjetibos que respeitan eilhas tamien la Lhei.
Ye assi que uns i mesmo todos daprénden como funciona la Democracie.

Un abraço

Ana disse...

I l que you digo an relaçon als stablecimientos de ansino penso que debe de ser la mesma cousa para todas las situaçones i anstituiçones an giral.

leonardo antao disse...

Buonas nuites Ana Marie!

Stou d'acordo qu'haba un cunjunto de regras qu'ampieça praxadelas que nun respeiten ls regulamientos de ls stablecimientos d'ansino, de las anstituiçones an giral i de la Lhei de la Democracie.

Bós sabeis que la praxe depende de la forma que ye feita i de l'atitude de l praxista i de l praxado. Por esso, ten las dues bertentes, buona i mala.

Quando ye bien feita, la praxe ansina ls balores sociales de sempre, cumo l respeito i de l'hierarquia i ajuda mui ls alunos l'antegráren-se nua quemunidade ounibersitária.

Quando ye bien feita, la praxe ten tamien ua amportante bertente eiducatiba, al preparar ls calouros pa l mundo de l trabalho, ne l sentido de tenéren que respeitar ua hierarquia i tenéren d'ampeçar por baixo i iren chubindo.

Fui praxado, i simplesmente gusto de la praxe, porque la spriéncia que ganhei, las pessonas que coinci, las situaçones que bebi i las lhágrimas que berti balírun la pena, porque me trasformórun nua pessona melhor.

Un abraço,
Leonardo

Ana disse...

Buonas nuites, Leonardo,

Ne ls países adonde nun hai praxes, feliçmente hai tamien antegraçon i bun cumbíbio antre ls studantes.

Inda hoije tornei a falar cun essa studante de mestrado de l'UTAD de que yá falei l outro die. Todo l que me cuntou an relaçon a l'atitude de ciertos praxistas era de assustar... cumo se de seitas se tratasse! Práticas de outros tiempos, de bárbaros i nó de giente cebilizada.
Pertual inda admite muitas cousas... até que acuntécen casos de grande grabidade. You cumo mai que tamien sou, acho einaceitable porque l nuosso deber ye antes de todo proteger... Antes que seia tarde. Ye esso na realidade l mais amportante. Quanto al resto (l'antegraçon, etc)tamien se cunsegue habendo respeito, respeito subretodo i nó práticas biolentas i cumpletamiente bárbaras i degradantes.

Buonas nuites

leonardo antao disse...

Buonas nuites Ana Marie!

La berdadeira praxe ye la que cuntribui pa l'antegraçon de ls nuobos alunos cun momientos de camaradaige, de fraternidade i de cumbíbio, i la que ye siempre praticada cun dignidade i respeito, puls balores i ls percípios de ls alunos. Por esso, nun puode haber cuntemplaçones culs malos praxadores qu'atentan contra estes balores.
Por esso, las ounibersidades dében tener un código de cunduta qu'ampeça las praxes académicas biolentas i las atebidades que pongan an causa la lhibardade, l respeito i dignidade houmana.

Un abraço,
Leonardo

Ana disse...
Este comentário foi removido pelo autor.
Ana disse...

Buonas tardes, Leonardo,

Tamien an França, chegou l'ambora de l que acunteciu na praia de l Meco, an special ne l Courrier Internacional que eiditou l eicelente artigo que José Pacheco Pereira eiditou ne l Público. I lhougo nas purmeiras linhas l título yá diç todo: La praxe mata !

An francés, ber aqui: http://www.courrierinternational.com/article/2014/01/30/le-bizutage-tue-les-corps-parfois-l-esprit-toujours?page=all

Se mata i puls bistos nun ye la purmeira beç, ye mais que ourgente que seia tomada ua buona decison, ua beç para todas. Senó ye la credibilidade de un paíç anteiro que stá an causa i ua jubentude neste momento tamien cunfruntada a muitos outros problemas grabes. Ye neçairo tener anton la coraige de resuolber esses problemas i de tomar ua buona decison.

Buonas tardes

leonardo antao disse...

Buonas nuites Ana Marie!

Eisistiran abusos ye cierto , que lhiebórun a la muorte. La recente situaçon ne l Meco ye de fato custrangedora, mas nun se puoden tecer generalizaçones na praxe. Nun ouniberso de miles de studantes de la Ounibersidade cumprendo que seia defícel ebitar ls abusos.

Ye amportante nunca squecer Ana, l propósito de la Praxe, d'ajudar ls nuobos alunos na antegraçon ne l'ambiente ounibersitairo, na criaçon d'amisades i na formaçon de lhaços de sólida camaradaige. Quien nun eisecuta la praxe cun este propósito, mancha la stória de la praxe, i çtrói l'antendimiento subre l que ye la praxe.

Aprecio la forma cumo defendeis la buossa oupenion, contra la praxe, mas nun ye suficiente para altarar la mie, a fabor de la praxe, porque acradito que la buona pratica de la praxe ó de qualquiera cousa que fazemos na bida, depende solamente de las nuossas scuolhas. I las mies scuolhas de la praxe fúrun siempre para “ajudar ls nuobos alunos na antegraçon ne l'ambiente ounibersitairo, na criaçon d'amisades i na formaçon de lhaços de sólida camaradaige.

Un abraço,
Leonardo

Ana disse...

A ber anton, Leonardo, l que la justícia bai a ser capaç de determinar eilha subretodo ne l caso de l Meco. Ye de sperar tamien que puoda ser feito normalmente todo l trabalho de ambestigaçon que ye neçairo fazer sien que haba pressones de uns ou d'outros. Depuis anton, será tiempo de chegar a cunclusones...
Anquanto i nó, ye bien pena chegar a estas situaçones! Bien scusadas !

Un abraço,
Ana Maria

leonardo antao disse...

Buonos dies Ana Marie!

Ls mius mais perfundos agradecimientos por tenerdes metido eiqui ne l Froles Mirandesas este cuntroberso i atual tema de çcusson.

Çculpai-me se algua mie palabra feriu la buossa fuorte cumbiçon, que muito stimo.

Un abraço,
Leonardo