10/02/14

L "2 de febreiro" an Zenízio



Tradiçones/Cumbíbios i bocheira
 
-To l mundo sabe que noutros tiempos, quando estes trés boubielhos (de quien bemos bien la cara) Válter, Basílio (a la dreita de l retrato) i Urbano (a la squierda), porque ls demais nun nacírun an Zenízio se criórun, nun fui cun tantas mesuras (fidalgos).
-Mas nun ye por esso, nien perde balor la tradiçon, nun quemimos (falo assi porque you solo ls deixai para sacar l retrato) bocheira, mas amentemos neilha, porque neste die era questume yá antrar ne l fumeiro, porque yá staba curado porque las matáncias de ls cochinos yá se tenien feito arrimado al Natal.
De beiços bezuntados d'unto ou nó, tirabamos la barriga de misérias quanto a quemer, i cumo nun hai garotico que nun le guste fiesta eilha era tamien un regalo pa ls uolhos quando mirabamos la fogueira de ls cepos a arder, pa l'alma porque lhebabamos l serano todo i pula nuite andrento ne ls jogos i an quadrilhas pul terreiro de la capielha de Santa Cruç.
-Pula cousas buonas i firmes que tenien i inda ténen las tradiçones nun hai que tener miedo de las repetir, téngan l nome que tubiren.
- Porque son l pulsar dun bibier dantes tan ou mais sano que ls tempos d'agora. Nun tenien las mesuras de ls tiempos modernos, mas tenien la calor de famílias ounidas, era l'ouportunidade de reforçar i atar ls afetos, cumbibir culs parientes i amigos que beníen de fuora a la fiesta.
-Naquel terreiro a la hora de la cena naide quedaba sien cenar, rapaç ou rapaza era cumbidade ajuntar-se a las famílias. To l mundo sabie que era assi que la mocidade de Zenízio se cumportaba, teniemos nomeada, eramos prouistas i faziemos queston de que assi fusse, nun era fai de cunta pa l mundo ber, recebiemos ls de fuora an nuossa casa cumo armanos.
" Lhembro-me bien quando you ou mie armana ou armanos chegabamos para cenar miu pai percuraba sempre adonde stában ls parientes i amigos de Malhadas, de la Speciosa, ou de Bilasseco, se acauso nun fussen yá cun nós"
- Agora doutro modo ne ls nuossos cumbíbios percuro por todos aqueilhes que nun s'ajúntan nesses dies.
- Hai cousas lhigadas a la nuossa criaçon que nunca se muorren. Todo esto nun ye saludade de arrecular, esto son las seinhas que l tiempo moderno nun fui capaç d'apagar.
 
Faustino Antão

Sem comentários: