08/01/14

FAI-ME UN LIKE




Cuncurso “Fai-me un laique” – Regulamiento

1. L Munecípio de Miranda de l Douro ourganiza l concurso “Fai-me un Laique” para dar a conhecer ls balores materiales i eimateriales de la Tierra de Miranda i animar al uso de la lhéngua mirandesa;
2. L cuncurso zambuolbe-se todo na páigina oufecial de l Facebook de l Munecípio de Miranda de l Douro;
3. Todo mundo puode partecipar, cunsante ls númaros a seguir;
4. L cuncurso fai-se de quinze an quinze dies;
5. De quinze an quinze dies, será publicada ua eimaige de la Tierra de Miranda, na páigina oufecial de l Munecípio;
6. Para partecipar, cada pessona ten de publicar ua legenda cun respeito a l’eimaige na caixa de quemantairos;
7. Cada pessona puode partecipar cul númaro de legendas que quejir;
8. Solo seran aceites legendas an lhéngua mirandesa, screbidas an respeito pula Cumbençon Ourtográfica de la Lhéngua Mirandesa i de la sue adenda;
9. Nun se acéitan legendas/quemantairos que séian oufensibos ou que afrónten pessonas ou anstituçones, que seran todas zarriscadas;
10. L ganhador de l cuncurso será la legenda que tenga l mais grande númaro de “Gusto/Like” na caixa de quemantairos de l’eimaige;
11. L tiempo de la botaçon cerra a meia nuite de l 14º die apuis de l die de la publicaçon de l’eimaige;
12. Apuis de cerrar la botaçon, l’anformaçon subre la legenda ganhadora fazerá-se na mesma páigina de l cuncurso;
13. Hai solo un prémio por cada eimaige, que será ou lhibro ou un disco de la Tierra de Miranda, andicado al mesmo tiempo que se publica l’eimaige;
14. Ls prémios puoden-se recebir na Cámara Munecipal ou ser ambiados para la morada que l/a ganhador/a andique;
15. Cumo ourganizador, l Munecípio queda cul dreito de ousar las legendas participantes para ls fines de l persente cuncurso;
16. Causos nó abarcados por este regulamiento, seran resolbidos pula ourganizaçon.



Bah, agora a ber se se bos squece de ir alhá a botar-le uns quemantairos balientes... i nun bal benir acá cula cumbersa: ah, i tal, you nun tengo registro ne l Facebook, nun quiero saber disso para nada!
Ora, carai, a mi, yá quantá que la mocidade de las scuolas me splicou bien splicadinho que quien nun ten Facebook ye cumo se nun eisistira ;)

8 comentários:

leonardo antao disse...

Buonas nuites Tortulhas,

Parabienes al autor desta guapa eideia que spero bá cuntribuir pa l’anriquecimiento de l patrimonho lhinguístico i cultural mirandés.

Un abraço,
Leonardo

Ana disse...
Este comentário foi removido pelo autor.
Ana disse...

Stimado Alfredo,

Inda hoije stube a falar cun ua colega mie subre l facebook i acuntece que hai aqui an França, subretodo a partir dua cierta eidade, ua resisténcia (para nun dezir ua rejeiçon i tamien çcunfiança) an relaçon a essa rede social...

Por esso, nun me bou inda a anscrebir. Mas cuntinarei por aqui... calmamiente.

Bede bien: nun somos todos oubrigados a fazer eigual i por bezes até ye buono seguir un camino defrente.

Feliç Anho Nuobo.

Tortulhas disse...

Biba, Ana, buonas nuites,

Stimo que las fiestas hában sido buonas i que 2014 bos traga todo de buono para bós i para ls buossos.
Bien beio que nun stais mi animada a antrar ne l FB; a mi, para ampeçar, passou-me l mesmo,inda que l miu miedo fura outro: passar alhá muito tiempo, que me fai falta para outras cousas... cumo rialmente.

Mirai, you cuido que la çcunfiança d'andar pul FB ye, mal acumparado, cumo un çcunfiar i nun salir de casa cun miedo de ser apatolhado. Mal acumparado, bá.

Bós fazereis cumo antanderdes, claro, mas, assi a modo d'animadela, siempre bos digo que fazeis alhá bastante falta, nunca ye de mais giente a botar-le an mirandés i esta quadrilha deiquei de l Froles anda por alhá toda, de maneira que zamparada nun quedais. I ye mais, para animadela final: arma-se alhá cada çcusson...hehe, stou cumbancido que bós tamien habiedes de gustar de partecipar!

Mas isto, claro, nun puodo star mais d'acordo que nun somos oubrigados a fazer eigual i claro que ye buono - ye muito buono - que cad'un baia por sou camino.

Un chi arrochado

leonardo antao disse...
Este comentário foi removido pelo autor.
leonardo antao disse...

Buonas nuites amigo Alfredo i amiga Ana,

Ls buossos comentairos deixórun l miu zassossegado sprito inda mais zassossegado, pul que nun resisti a deixar-bos eiqui la mie oupenion subre l Facebook.

L'outelizaçon de l Facebook i d'outras redes sociales ye para mi un eicelente strumiento de partilha d'eideias i de spriéncias que mos puoden ajudar a melhorar ls nuossos coincimientos i ls nuossos relacionamentos, i a cuntribuir pa la melhorie de la nuossa formaçon giral.

La scuola i l'ounibersidade son cumo ua cidade cun muros que la lhimitan. Yá l Facebook, al amberso desso, ye cumo ua biblioteca ó praça pública adonde podemos ancontrar todo l tipo personas i de coincimientos, cumbersarmos i trocarmos spriéncias, sin naide a cuntrolarmos la nuossa eimaginaçon.

L'amportança de l Facebook carateriza-se, para mie, pul fato de me poner an formaçon cuntina, porque ten ua eimensidon d'anformaçones i coincimientos çponibles, que me lhieba a studar i a daprender cada beç mais cousas.

Un chi arrochado,
Leonardo

Ana disse...

Buonas nuites, Alfredo i Leonardo,

Agradeço muito la buossa atençon i çculpai pul tiempo que passestes para tentar cumbencer-me a aderir you tamien al Facebook. Mas finalmente, pensando an bós, acabei até por screbir un texto para splicar afinal porque ye que até agora nunca me deixei cumbencer .

Mas puodo-bos dezir que fui hoije pula purmeira beç se bien lhembro até esse « site » de l « Município de Miranda de l Douro » i até tube ua buona purmeira ampresson anque you pessonalmente nun guste muito dessa disposiçon subre dues colunas cumo muitas bezes ye l caso (ou siempre…) ne l FB.

Por esso tornarei a pensar nessa buossa propuosta quemun i mui cumbidatiba apesar de you tampouco disponer de muito tiempo. L que se passa quando me pongo a screbir i que l assunto m'antressa ye que muitas bezes ampeço, i quando ampeço depuis quiero ir até al fin i só depuis ye que me dou de cuonta de l tiempo que passei i até chego por bezes a arrepender-me. Tamien receio que acunteça l mesmo cul Facebook.

Mas ua cousa nun deixarei de bos dezir : Un abraço cheno de amizade pals dous !

Ana disse...

I mais ua cousa que quiero dezir a Alfredo que lançou essa eideia de legendas an mirandés cun prémios todos ls 15 dies: ye por acaso ua buona eideia. Han de partecipar aqueilhes que quejíren mas ye buono haber aperpuosto l'eideia. L mais cierto até ye que apareçan nuobos scritores i adeptos quaije ancundicionales de la lhéngua mirandesa cumo nós yá somos. Apanhemos un die l bírus i agora nun hai pula cierta nada a fazer para l ber zaparcer ou para que diminua d'antensidade... Un bírus agarrado a la piel que mos acumpanha zde siempre i até hoije;

Un abraço para ls dous i para todos ls que tamien senten l que ten de buono afinal esse bírus chamado por eiemplo: Lhéngua Mirandesa.

Ana Maria