03/01/14

Anho Nuobo bida nuoba


Quaije se puode dezir que la direcion de l’Associaçon (Ass. Cultural i Recriatiba Nial de la Boubielha) astanho fizo uso deste dito dezideiro de l pobo.

Porque mesmo que tenga puosto an biesperas, uns dies antes de l 2014 nacer, l nuobo site www.nialdelaboubielha.com a público, el ben bien cul Anho Nuobo. Esta decison de la direcion an fazer-se ua nuoba bercion, ua bercion mais prática i renobada, cuido you que fui ua buona decison.

Cumo muitas cousas na bida, tamien na bida de las associaçones, hai que acumpanhar ls tiempos, nun se puode quedar agarrado al tiempo dantes, subre pena de nun acumpanhar la camarada. I nesto de l’anformática, de ls sites, 4, 5, 6, anhos de bida ye muito tiempo, ye ser bielho.

Mas se cierta fui la decison d’amanhar las cousas, nun ye menos cierto que agora l que ye preciso, l que la direcion mais l’admenistraçon quier ye que seia ousado i outelizado. Esta jinela (ourgano oufecial de l’ACRNB) birada al mundo n’anternete, stá siempre çponible an Mirandés i Pertués a to ls associados, cunterráneos i amigos, a scritores, artesanos, pintores, que quérgan publicar las seus crónicas, testos, cuontas, poesie, lhiendas, amboras andebiduales ou coletibas que steian lhigadas a la quemunidade Zeníziense bibindo n’aldé ou fuora deilha. Quier que seia un spácio adonde l associatibismo, la lhéngua i cultura mirandesa tenga perbileijo.

Este sítio ten que ser outelizado, lido i divulgado, porque se assi nun fur, todo l sfuorço, eiquenómico i houmano ye feito an bano. Ls oujetibos nun séran alcançados, quedará só un sítio de dibulgaçon de las atebidades i amboras de l’Associaçon, i la outra parte, la scrita an mirandés, ls questumes, tradiçones i la cultura an giral queda por fazer(divulgar).

(Tamien stamos an: www.facebook.com/ACRNialdelaboubielha)
(Cuntato n'anternete:   nialdelaboubielha@gmail.com Este endereço de email está protegido contra piratas. Necessita ativar o JavaScript para o visualizar. )
 Faustino Antão

3 comentários:

leonardo antao disse...

Buonas nuites Faustino,

Parabienes por este antressante testo de dibulgaçon de la nuossa associaçon.

Ne l’ampeço de un nuobo anho partilho cun todos ls amigos de l Nial de La Boubielha, botos de Un Feliç Anho Nuobo, cun sperança, qu’algo melhor stá para benir.

Un arrochado abraço,
Leonardo

Ana disse...

Caro faustino,

Fazistes bien an guardar un site porque nun ye todo mundo que ten cuonta ne l facebook. Ye l miu caso porque por anquanto nun beio la necidade ou mesmo l antresse de dedicar tamien tiempo a essa nuoba ferramienta...

Pul cuntrairo siempre gustei de dar ua oulhadela ne l buosso site. Sabeis se a partir de la lista de ls sites referenciados ne l Froles tamien ye possible chegar agora alhá diretamente?

Bien háiades pula respuosta

Ana Maria

faustino.antao disse...

Buonos dies amiga Ana

Zde yá mais ua beç un bun ano de 2014 i tamien para toda la família.

-You ne l site i ne l facebook sou só un trabalhador puis nun fago parte de ls uorganos de direcion.

-Mas tamien nun tengo cuonta ne l facebook

Quanto a la queston de aceder diretamente an "Frolesmirandesas" al nuosso site, neste momiento nó, porque alhá stá referenciado al antigo, ye ua cousa que hai que tratar cul repunsable de l blogue. Agora l melhor ye tene-lo ne l favoritos.

Deseio que assi cuntine culas crónicas que you leio i admiro.

Saludos para todos i un beiso de muita amizade i simpatie.

Faustino