18/09/11

La Bouba de la Tenerie

An Lisboua comemorou-se l die de la Lhéngua Mirandesa i cun alqueire aqueculhado de sábias palabras, ne l salimiento de ls lhibros, la Bouba de la Tenerie, an mirandés i Tiempo de Fogo, an pertués.
Ls outores son mielgos berdadeiros, eigualicos, daqueilhes que pónen ls pelos de punta a qualquiera porsor. Francisco Niebro screbiu an mirandés i Amadeu Ferreira an pertués.
Nun me bou a detener na tarde cultural porque melhor que you alguien relatará l que se passou na Librarie Ferin, alhá pals lhados de l Chiado, an Lisboua.


Bou-me a quedar cun la Bouba de la Tenerie.
L lhibro, La Bouba de la Tenerie, fui ua de las mies lheituras de férias, diga-se, un tiempo bien ambriado.
Dixo la porsora apresentadora de l lhibro Tiempo de Fogo, Porsora Teresa Martins Marques, " nun perdo tiempo cun aqueilho que nun sirbe para nada, nien gusto. Este tiempo que gastei, fui bien ambriado".
Tamien you, eilustre Porsora, mulhier de sábias palabras i de cultura riquíssema!
Tamien you, na eidade an que stou, nun gusto de çperdiçar l tiempo cun l que nun me gusta nien m´antressa. Yá tengo açimbrado cun lhibros pa la stante i alhá quédan a ser quemidos pulas polielhas. Nun fui este l causo, bien alrobés.
Inda nun li l de l mielgo Amadeu Ferreira; bou a deixar passar un tempico i apuis si l bou a pegar, puis até stou curgidosa, por nun se tratar de traduçon.


L lhibro de la Bouba de Tenerie prendiu-me horas seguidas a la cadeira, ambaixo de la cereijeira a la puorta de la mie casa, na Speciosa, siempre cun ganas de me meter cada beç más andrento de la stória que anda alredor de fraile Antonho, un home que tenie l don de la palabra, que curaba ls males pula palabra i que cumo muitos outros fui agarrado pul fogo de l Tribunal de l´Anquesiçon, un tiempo d´hourrores, tan bien ambestigado pul outor. 
Hai rialismo an cada palabra, an cada camino a cruzar las aldés de l Praino, seia de Sendin a Miranda, seia a camino de la feira de l Naso a bender alforraque.
Fui l pormeiro lhibro que li an que la stória se passaba andrento de ls lhemites por adonde medrei, que chama puls chamadeiros que conheço i isso anchiu-me de proua.


Al mesmo tiempo que hai rialismo, tamien hai magie, hai magie na dureç dua stória dura, hai magie nas nacientes d´eirotismo i sensualidade que por alhá mánan.
Nun quiero antrar na stória porque senó ye cumo nos filmes, perde l eifeito surpresa.


Bien haias, Francisco Niebro!

4 comentários:

ACangueiro disse...

ya bos tenie lhido ne l facebook. Mira que relataste cumponeste lhogo la cousa mas mais haberá o fazer-lo. Cumo ya puso ua cousica pequeinha ne l facebook eiqui nun pongo nada. Mas que me gustaran muito las apresentaçones, foi de ancher la barriguita i quaije de bolar para alhá de cielos na tierra. Bien haia a Francisco Niebro, a Amadeu Ferreira i apuis aqueilhe Fraile, Antonho de seu nome, nun era tontico mas atamaba las delores de Lourinda, tuntica mas cun ganas de oubir las palabricas soltas i sabidade de fraile Antonho que le gustaba outros homes mas era home muito sabido i capaç de ancandilar ls homes cun palabras i hai quien diga que falar cansa...

franciscobelharino disse...

Buonas tardes Delaide,
Parabienes pul testo que stá mui baliente. You tamien fiç un testo que mandei para Amdeu mandar pa la fuolha mirandesa i apuis tamien será puosto eiqui ne l Froles, juntamiente cun retratos de la fiesta.
Un beijo, Francisco

Adelaide Monteiro disse...

Francisco:

Sabendo que tu ibas a fazer algo bien cumpleto ye que you quaijeque nada dixe de la cerimónia, mas solo falei de l Lhibro de Francisco Niebro.

Un beisico,

delaide

leonardo antao disse...

Buonas nuites Adelaide:

Qu'ancantador i anriquecedor fui para nós ls mirandeses i amigos de l mirandés tenermos ido a la papelarie Férin comemorar l die de la Lhéngua Mirandesa i scuitar las sabies palabras de todos ls ouradores, cun special çtaque pa las de la Porsora Doutora Teresa Marques, que fazirun honra a todos ls nuossos antepassados i a las nuossas famílias mirandesas.

De l miu amigo Luis Vaz das Neves, que fizo la apersentaçon de l lhibro "La Bouba de la Tenerie" çtaco,(alen de las angasgadelas) l'eicelente final, "La Bouba de la Tenerie, ye tamien Tiempo de Fuogo, l tiempo de cada un de nós, stramuntanos de sprito caliente i apaixonado, que traemos na carne la fuorça de la Tierra i ne l mirar l Fuogo i la fuorça de ls grandes rializadores de suonhos i que, tal i qual cumo Fracisco Niebro, afirman la sue perséncia..."

Ne l final desta grande comemoraçon i salimiento de ls lhibros,quedei cula certeza de qu'esta nuossa lhéngua mirandesa, acolhida ó rejeitada, scrita, falada ó çprezada, cunduzirá, mais tarde ó mais cedo al reconhecimiento stórico de l'heiroicidade deste pobo anseparabelmente lhigado la Stória de Pertual.

Parabienes a la Acdemia de Letras de Trás-los-Montes, a la Áncora Eiditora, a la Asociaçon de Lhéngua Mirandesa i a la Libraria Ferin i a todos ls que participórun neste fantástico die de la Lhéngua Mirandesa, que fui dua culidade andizible i andescritible i a bós Adelaide por esta guapa çcricao.

Un beisico,
Leonardo