09/09/11

Solo un ouriço cacheiro a passear-se...











Caminar fai bien a la salude! La caminada ten que ser: «passo delgeiro, sien parar i al menos trinta minutos», diç la doutora. Hai dies que nun ye fácil, nun hai apetite: la preguiça; outros hai que se stá menos mole mas apuis la cena achega-se al çofá, senta-se i bai-se..., bai-se quedando mole i mais mole..., passado un cachico ya stá: brrrrrr, brrrrrr, sorneia-se; será seinhas de belheç? ou repouso de guerreiro? La belheç nun se admite, menos mal, l repouso de guerreiro! Un nun se puode acomodar a esta morrinha, senó nun se quier outra bida i apuis reampeçar yé siempre mais custoso. Las piernas quedan moles, ls pies prenden-se al chano, sien falar na barriguita que bai ficando mais grande. Apuis nien las piernas nien la cabeça oubedéçan a la buontade de l duonho ou la preguiça ye mais fuorte que la gana.
Diç la doutora que nun se puode parar a meio de la caminada mas hai dies que la paraige yé oubrigatória. Assi foi, nun fosse la oubrigaçon un ouriço cacheiro de pelo spetado, oulhicos mui arregalados mas assustadicos. Puoso la cabecica al para baixo, angarabatou las pernicas i alhá se quedou sossegadico para que naide le fazisse mal. Caminaba debagarico por meio de uns murgaços, uas yerbicas secas, aqueilhas de fin de berano, buonas para ls ancendiairos, ou ls çtraídos deitáren ua priçca fuora i assi se ampeçar un ancendio. Mas, nien houbo ancendio nien se morriu naide, solo un ouriço cacheiro a passear-se ne l meio de murgaços que anterronpeu la caminada deilhe i la mie.




Bale de Milhaços, 8Set11

3 comentários:

Almendra disse...

Antonho,
Gustei de l testo, si ye ua pena ber un ouriço-cacheiro muorto na strada, mas muitos puoderíen star bibos se todos tubíssemos mais cuidado.

Pon ende l tou mail que nun l tengo.
Abraço
Almendra

Tiégui disse...

Par'aqueste animal, an Cicuiru tengu oubidu dues maneiras de dezir; ua yê la de ouriçu, l'outra yê porcuspinu.

Pur eisemplu habie un tiu an Cicuiru que dezie : ha porcuspinu porcuspinu, se t'apañu matou-te pur un copu de vinu !

Si si lus ouriçus son purreirus :)

ACangueiro disse...

Tiégui, acho que porco spinho ye mais l cochino brabo, l que se chama porco brabo. Mas you tamien nun stou cierto. Puoda ser que un mais antendido mos diga algo.