12/09/11

L nuolo ne l lhençol



(Un cuonta yá mui conhecida, mas nunca ye de mais cuntar-la de nuobo, i desta beç an mirandés)


Nua assemblé de pais na scuola, la porsora repunsable por recebir to l mundo, chama atençion de todos l’amportánçia que ten para ls sous filhos todo l apoio, i ajunta un pedido, que s’amóstren persentes siempre i l mássimo possible..

Eilha fazie este pedido porque cuidaba que la maiorie de ls pais trabalhássen fuora, l que era berdade, mesmo assi deberien arranjar tiempo para star culs sous ninos.

Mas la porsora quedou mui admirada quando un pai s'alhebantou i splicou, houmildemente, que nun tenie tiempo de falar cul filho nien de ber-lo durante la sumana, porque quando el salie para trabalhar era mui cedo i l filho inda staba a drumir i quando buolbie de l trabalho era mui tarde i l filho yá drumia.

Splicou, inda, que tenie de trabalhar tanto para sustentar la família, mas tamien cuntou qu'esso l deixaba angustiado por nun tener tiempo pa l filho i que tentaba componer las cousas, dando-le un beiso todas las nuites quando chegaba a casa.

Mas, para que l filho sabisse de la sue persença, el daba un nuolo na punta de l lhençol que l tapaba. Esso acuntecie religiosamente todas las nuites quando iba beisar-lo.

Quando l filho çpertaba i bie l nuolo, sabie lhougo, que l pai tenie stado eilhi i l tenie beisado.

L nuolo era l modo de comunicaçon antre eilhes.

La porsora quedou chena d’eimoçon cun aqueilha stória i quedou surprendida quando custatou que l filho desse pai era un de ls melhores alunos de la scuola.

Este fato, fai-mos pensar subre ls muitos modos de las pessonas s’amostráren persentes, i de comunicar culs outros.

Aquel pai ancuntrou la sue, qu'era simples mas eificaç.

I l mais amportante ye que l filho antendie, atrabeç de l nuolo, l que l pai staba a dezir.

Géstios simples, cumo un beisico i un nuolo na punta de l lhençol, bálien, para aquel filho, muito mais do que persentes ou la persença andiferente d'outros pais.

Ye por essa rezon que un beiso sar la delor de cabeça, l'arranhon ne l zinolho, ou l medo de l scuro...

Ye amportante la preocupaçon culs outros, mas ye tamien amportante que ls outros l sában i que l síntan.

Las pessonas puoden nun antender l segneficado de muitas palabras, mas sáben reconhecer un géstio d’afeiçon.

3 comentários:

Almendra disse...

Faustino,
Yá sabie la cuonta, mas ye cumo dizes, nunca ye demais tornar a cuntá-la i an mirandés inda melhor.
Nun quieres saber que m'eimocionei.
Oubrigado por la cuntares.
Almendra

faustino.antao disse...

Caro amigo Almendra

-Cada beç las cousas fázen mais sentido, porque ls afetos stan botados al sbarrulhamiento, i ye essa classe de porfessionales que son ls porsores i porsoras, que mais se dan cuonta, puis son eilhes que stan mais tiempo cun uolho neilhes, las muralhas que debien portejer ls ninos stan an peligro.

-Un rapaç ou ua rapaza, stá andefesa ne ls dies d'hoije, stá a medrar i todo l mundo stá mais a mirar pa l sou ambelhigo, an beç de mirar pa l feturo, que son eilhes.

-Un abraço i até lhougo
Faustino

José dos Anjos Rodrigues disse...

Faustino.
Hai soluçon para todo!.. Ye solo ancontrá-la.
Este pai ancuontrou la sue i ye comobente...
Gustei de la stória scrita an mirandés.
L'abraço siempre amigo
José dos Anjos