09/09/11

Ando çcaçuado cula tecnologie



Se hai cousas que a mi m’agrádan ye ls abanços que l mundo ten feito na tecnologie, i demos las buoltas que dirmos, hoije l mundo nun ye nien de acerca nien de loinge l que era quando you me criei, i inda bien, muito menos quando you criei la mie rapaza (hoije cun trés dúzias d’anhos d’eidade).

Dezido doutro modo, era un atraso de bida, criei-me nun tiempo an que la tecnologie ne l que toca a garoticos nun soubo mais nada que fazer a nun ser rachar las calças ne l culo, binte i quatro anhos apuis naciu la mie nina, i anton yá las cousas stában un cachico mais guapas, yá habie uns culeiros (fraldas) panhos que se lhabában, tenien uns zenhicos, i ls ninos yá se sentian bien arrumadicos sien tener eili nas partes ua jinela a recebir l aire a to la hora, que solo serbie para botar fuora l ampesteiro que salie de las tripas.

You lhembro-me cumo se fusse hoije, lhougo nas purmeiras besitas ne l spital, pedi a ua anferneira para m’ansinar a dobrar ls culeiros, que era an trés bicos i dun jeito para l alfinete dama nun picar la barriguita, porque sabie que quando benisse para casa era ua lhida tamien mie, demudar ls culeiros quendo stubissen çúzios.

Agora stou a cuntas cul miu nieto, durante l die, ten un anho, i el ye jogos de jogar i brincar por todo l que ye sítio de to las fuormas i feitios, ende stá la tecnologie, uns cun bruido outros cun botones i luzes, bonda el carregar nun botonito i yá l parro fai cuacua, carrega noutro i yá la corneta de ls bumbeiros toca, noutro fai l música de drumir, fálan pertués i anglés (alhá benirá l tiempo de haber berciones an mirandés, inda nun ye tarde) ne l que toca a culeiros, eilhes son bien purparados para nun deixar salir nada, son assi a modos de cerrona, nun ye perciso alfinete dama, eilhes agárran (cólan) adonde un quier, i nada de ls lhabar ye para botar fuora i se possible bien debreve.

Mas miu Dius, para un saber quando percísan de ser demudados, quando el yá fizo l serbício, se nun resmungar ou fazir mala cara inda ten que ser pul cheiro.

Ye causo para dezir, porra quando ye que la tecnologie ambenta un modo de poner un alarme ou ua lhuzica que seia para un saber quando stá na hora?

Até cuido quel agradecie, porque a las bezes ls crecidos, mesmo nun gustando de l fedor, lhíban tiempo a dar por eilha.

Muito buonos dies a todos i até lhougo

3 comentários:

ACangueiro disse...

Faustino, logo pula manhanha, bós fazeis-me rir al buono rir. Ohora ua destas, agora tamien querieis ua lhuzica para andicar que l garotico tenie cagado la fralda. Bós si sodes un home de l feturo. Foi buono saber stais bien afeito al buosso nieto i que todo bai bien.
Abraço arrochado,

antonho

faustino.antao disse...

-Ah Antonho

-You nien te cunto, até als oulores you tube de m'afazer.

-Yá nun ls conhecie, porque ye bien defrente, mesmo que haba giente que diga que la caca cheire toda mal.

-La mai i la abó dezien-me, ye só cheirar, mas you cuidaba que l oulor era todo eigual, mas nun ye, agora puodo dezir que l fedor de la m.... que ls crecidos fázen ye mil bezes pior que la de ls garoticos.

-Un abraço
Faustino

Almendra disse...

À Faustino,
Si cunteste bien l que ye la bida i essa de l botonico i de ls oulores ye bien berdade. L miu nietico tamien solo ten 17 meses i passa-me todo eigual quando stou cul. L que ye perciso ye que todo baia bien.

Abraço
Almendra