L home fai cousas...diga-me quien lo saiba porquei?

Pertual, esto cachico de tierra, assi a modos de retangulo ten muitas tierras. Mas tamien ten muito mar. Solo ambentei no mar porque ya lo calcarriei muitas bezes mas nada ten haber de l que quiero falar. Bou mais falar de tierra. Tierra de fronteira, adonde tanto se oube falar pertués cumo castelhano. Dezir que hai lhugaricos, aldés, bilas i cidades que muitas bezes solo oubimos falar deilhas i outras que nunca oubimos falar. Mas hai uas de que se fala tanto que ye cumo se ya tubíssemos acalcado la tierra ou ls paralelos ou l alcatron de sues rues ou abenidas. Mirado sue castielho, sue eigreija, sue capielha de uossos, l museu..., sei alhá quantas cousas. La telebison, antramos portas andrento que mais parece que somos nós que stámos alhá. Apuis hai ls politicos quando ls cheira a pessonas, muitas pessonas, ten que se mostrar puis nestas oucasiones nun ye perciso pagar para fazer ajuntouros. Las telebisones tamien le gusta i por esso meten-se-mos portas andrento sien pedir licença i sei alhá quantas bezes al die.
L sábado passado bejitei ua tierra que nunca tenie bejitado i gostei. Fui dapropósito alhá para ber i nun ser la telebison a mostrar. Caralcho, you que nun sou muito destas cousas gostei. Solo querie que bíssedes, bós tamien bistes mas na telebison, mas ber assi pertico ye bien defrente. Apuis pensaba: l home fai cousas que nien las pensa l diabro! Anfeitar rues i rues cun frolicas de papel cun quelores de todas las que hai na naturaleza i cun zeinhos de todas las maneiras i feitius yé de cogones. I, bolteia-se-me l mesmo pensar: porquei i para quei l home fai estas cousas? Tantas horas, tanto trabalhico para anfeitar rues, solo para mostrar i se las rues staban chenicas de gente. Uns al para baixo, outros al para riba, solo para mirar l que outros fazíran. L home fai cousas...diga-me quien lo saiba porquei?

Fui assi que you bi las fiestas de las froles de l pobo de Campo Maior.