22/09/11

DIE MUNDIAL DE LA PAÇ




DIE ANTERNACIONAL DE LA PAÇ



L die anternacional de la paç
Anunciado desta maneira
Quando ua palomba apareciu
Trazendo un ramico d´oulibeira

Muita cousa se ten dito
Subre esta guapa paixarica
Quinda hoije cuntinua sendo
Neste mundo mui guapica

Inda ne ls tiempos que cuorren
Lhembramos l que aconteciu
I quedamos todos cuntentos
Cula alegrie queilhi eisistiu

Bibimos die a die lhembrando
De l que la palomba ye capaç
I pedimos cunstantemente
Que mos buolba a trazer la paç

Puis nestes tiempos que cuorren
I cun tanta cousa que se passa
Nós bemos que neste mundo
La paç anda tan scassa

Bibe l mundo rebuoltado
Cun tanta cousa que se faç
Mei mundo matando outro meio
Nun l deixando tener paç

Neste die tan special
Pedimos desta maneira
Que Dius mos mande ua palomba
C´un ramico d´oulibeira

Que nesta fase de la nossa bida
Que yá todo mos ultrapassa
Ye que queremos ancuntrar paç
Onde eilha ye tan scassa

Spertai senhores de la tierra
Que stais nun siléncio profundo
I pedi-le un pouco de paç
Als grandes senhores de l mundo

Haber s´eilhes inda la tenen
Que de l jeito queilhas stan
A mie yá nada me admira
Queilhes tamien nun la teneran

Amanhamos-mos cumo pudemos
Cula la pouca quinda tenemos
I repartimos-la uns culs outros
Que só assi ye que bibemos

L die anternacional de la paç fui onte, mas onte nun cunsegui antrar
mesmo assi inda bamos a tiempos de fazer la paç.

José António Esteves

2 comentários:

"Scacição" disse...

PARABIENES senhor José Antonho,gustei de ler estes bersicos carregados de paç.
Bien haia i que la pombica branca cul ramo de oulibeira ande siempre pur ende:)

José Esteves disse...

Oula SCASIÇÃO.

La palombica sie bai passando
i até trai l ramico d´oulibeira
mas yá pousa pouco porqui
que l mundo yá ten muita rateira.

Abraços cun muita paç

.
José António Esteves