11/11/08

Nubrineiro





Manhana nubrineira, tarde soalheira. Fui mesmo assi que l die onte porqui mos cuntemplou. Botei-me mie rue abaixo, cumo muita beç l fago sien tino nien çtino, destas manhanas anfarinadas até nien zgusto, solico que nien bagamundo nun tengo amo nien duonho. Durante la caminada i sorbendo l aire friu nien me dou de cuonta de l sfuorço i l’amportáncia que ténen estes cachicos.
Las narizes reçúman monca augada a pedir cuidados mas, desses sei you tomar cuonta, assi you fusse capaç d’aturar ls pensamientos, que nun sfregante chégan a trote i als tropeçones an çputa dun lhugar d’eileiçon. Son la cumpanhie d’horas i horas, lhíeban-me para loinge, fáien-me squecer l reloijo, la çtáncia i l tiempo gasto. Estas caminadas fáien-me bien a las piernas i a la cabeça, quantas bezes berdadeiras lhimpezas, aparto l buono de l malo, cumo se l’araige de la rue fusse la mesma duas eiras apartando l grano de las barreduras. You, a las bezes, cismo-las dun modo mouro, i agarro-me a ua einocéncia d’anjo para acraditar que todo puode ser çfrente soutordie, malo ne l ampeço i un arrematar feliç. Á, cumo you gustaba que este nubrineiro social que mora i medra na mie rue, lhougo a la tardica fusse un soalheiro.
Yá la manhana iba alhungada quando l nubrineiro dou muostras de s’ir, botando uas raleiras i l clareio de l die ampeçou a fazer l sou arraial. You de buolta a casa miraba agora pa las antradas i scaleiras, para ambaixo de ls alcadutes i puontes i yá ls cobertores i mantas stában sien naide. Era cumo se l nubrineiro habisse feito trato culs que passórun eiqui la nuite a quedar-se até mais tarde para ancubrir la miséria i la probeza, l modo de bida de ls que nun ténen arrimo nien paradeiro. Mas todo esso nun bundou para you acreditar an dies melhores, tenie la maldita certeza que ls moradores destes recantos i nojos tenien que eiqui drumir porque todo cuntinaba na mesma.
Las manhanas anubradas nun ténen culpa nanhua.

2 comentários:

Tortulhas disse...

Ye berdade que la nubrinha ampeça a aparecer nas nuossas tierras i bai a quedar nun se sabe por quanto tiempo. Cumo la recesson, que ye l cuntrairo de l crecimento. L fin de l “cada beç mais!” para aqueilhes que yá tenien muito i, anfelizmiente, de l princípio de l “inda menos” para aqueilhes que nun tenien grande cousa. Ora, l anho-chabe deste nuobo seclo, pansábamos que serie 2001 i l ampeço de la guerra contra l terrorismo. Mas, cun la recesson, l mal inda ye mais ciego: son las eiquenomies que súfren ua orde que ye l“financeirismo”, la manie de l “a curto prazo”. Menos cunsumo, menos carros a ser feitos …çpesas cumedidas ne l aire. L planeta puderá quedar mais amparado? Serie um eifeito culateral absluto. Diante de las deficuldades que se apreséntan, puode haber outros aires pusitibos a nun perder: lhemitaçon de las çfrenças, regresso al mais amportante quanto als gastos, menos fartura i menos gastos. Mas estas abantaiges solo baleran la pena se la cuncéncia de ls homes se tornar coletiba e se nun furteficar ls anteresses de cada un. Ye neste terreno que speramos ls mais poderosos deste mundo.
Adriano Valadar

Tortulhas disse...
Este comentário foi removido pelo autor.