Ua de las muitas modas que amostro al miu nieto reza assi:
…Boubicas ándan las pitas para poner l uobo alhá
ne l buraco, sgarabátan, sgarabátan para alisar la tierra, çpenhícan, çpenhícan
para fazer l buraco...
-Arrebita la crista l
galho todo prouista
-Có-có-ró-có-có cantaro-la
l galho refilon i todo amprouado cun
aire fanfarron ye l xefe de l batalhon.
Pássan tantas bezes, l’outelidade desta modas tan amportante
pa l sou crecimiento, todas eilhas na Tb, discos i bídeos, ls meios çponibles
desta era, porque ténen sonidos, géstios, palabras, mobimientos, todo un munton
de cousas úteles para ls ninos daprenderen.
Yá you, ne l rescaldo de ls mius sentidos, porque stou n’outra
punta de l rosairo d'anhos, matuto un cacho. Será que las piticas que stan ne ls bídeos, chenas
de buona fé stan assi tan pimponas i bien bestidas, será que percísan assi
tanto de sgarabatar la tierra para ancuntrar l buraco i poner l sou uobo?
Hun..., çcunfique que nó!
Que l galho cuntina todo refilon, amprouado i xefe de l
batalhon, cun aire amportante que nien un palico le antra ne l culo ye berdade.
Peç que rei daquel reino i de to las pitas deste i de l
outro mundo tamien ye berdade, mas podie al menos ua beç dezir adonde stá l
buraco a las probes piticas, puis nun íba a tener grande deficuldade
apuntar-lo, nien serie mui çficele a eilhas ber-lo porque ye taludo.
Mas isso sou you a falar i quedai çcansados que estas cousas
inda nun fázen parte de las cumbersas que tengo cun el, que medre feliç, que
estes cobradeiros de cabeça son para i de la repunsablidade de ls crecidos.
Cumo tamien, i el inda nun sabe lher mirandés, nun cuorro l
peligro de stragar l mundo de fantasie quel bei i bibe, outra cousa serie
eirrado, alhá benirá l tiempo, se Dius quejir çpertará pa la realidade.
Agora par'el i todos ls ninos deste mundo l amportante ye
bibiren i medráren felizes, l fai de cuonta que seia grande, cun muita fantasie
a la mistura que ye tan buono cumo la papa, un mundo cheno de cousas guapas i
saborosas, muitos jogos para brincar, pais i abós pa ls amparar, eiducadores i
porsores pa ls ansinar i yá agora alguns gobernantes hounestos i sérios tamien
nun fazie mal nanhun tener.
Cuntino a cuido que la cunsumison ye para nós (crecidos),
nós ye que tenemos que rober las códias, se mos sultórun ls perros anton nós ye
que tenemos l’oubrigaçon d’afilar ls caneiros i rober ls uossos destas áfricas.
2 comentários:
Essa de las pitas boubicas ye mui antressante p´ajuntar géstios i assi l zalbolbimiento de ls ninos fai-se debagarico i cun alegrie; ora si, Faustino? Anté a mi siempre me gustou essa moda.
Las dues yá bénen de la criaçon de las mies ninas.
Enviar um comentário