08/09/16

Ls suonhos son bisuonhos


Çpertei arrimada a las cinco de la manhana (inda nun se bie un germo na ruga) i nun fui cun miedo de ls lhobos cumo quando era pequerrica i pegaba l sono agarrada a la grima. Cun ls lhobos anté sonhaba acordada cun l coraçon nun punho. Çpertei i pronto. Cuido que fui por bias de ls cafezicos que tan bien me sáben.
Abri l facebook i quedei agarrada als bolhos de la derradeira fornada de Gingigica de Sendin. Até me chega l cheiro caliente de pan acabadico de salir de l forno. Talbeç pula tarde bá a mercar un pan desses al Naso (stan a meter-se puls uolhos andrento!). A ber se passo a zlhado de l pan de Dius que siempre trago quemigo - cuntentica. Ah! que cheirico a coco! Bonda l pan de Gingica, mas lhougo se bei. I se me topo cun Adelaide Monteirocumoquiera mercamos l pan de Gingica i l pan de Dius.
Apuis leio ne ls Froles mirandeses algo que you nun sou capaç de screbir cumo António Antonio Cangueiro que miles de bezes sobelou bezerro i cuntraforte i sedielas an puonta de lhinha. Solo quien lo fizo scribe tan acertado. Mas falaba tambien de suonhos i lhembra-se-me dun an mi recorriente : alhá iba you cumo artista de trites anriba dua parede an lhinha i auga por todos als lhados. Acerquita, agarrada a la parede, staba ua casa branca cumo las nubres, acerquita mas - cumo a eilhas - you nunca le chegaba i quaije nun abançaba. L miedo tolhie-me als passos.
Outro suonho que se repetie era aquel an que you staba mui pimpona, prontica pa las aulas ou las fiestas i nistante quedaba fuora de todo porque nun lhebaba çapatos. Yá nun bie mais nada a nun ser ls mius pies çcalços. I assi çpertaba cumo se la bida me cortasse siempre l passo. Cuido que fui la sabedorie de la mie abó Adília que me fui sacando estes miedos: ls suonhos son bisuonhos,
 dezie-me siempre que you le cuntaba estes caminos trabessos.

Teresa Almeida Subtil



Sem comentários: