Percurórun a ua nina de 5 anhos d’eidade l que gustarie de
ser quando fusse crecida.
Eilha espundiu:
-Gustarie de ser abó.
Mas porquei?
La nina respundiu:
-Porque ls abós scúitan,
anténden. I, para alhá de todo esso, la família s’ajunta na casa
deilhes.
-Ua abó ye ua mulhier belhica que nun ten filhos. Eilha gusta
de ls filhos de ls outros.
-Un abó lhieba ls ninos a brincar e fala cun eilhes cumo se
péscan ls peixes e outras cousas asparcidas.
-Ls abós nun faien nada, e por essa rezon puoden quedar cun
nós mais tiempo. Cumo eilhes son belhicos, nun son capazes de se rebolcar nien
correr, mas nun fai mal míran por nós. Tamien mos lhiéban a ber l que ponen ne ls sotos i a quemer
pisas i bolhos.
-Tamien mos lhiéban a passear pul termo i amóstran las froles
i mos cúntan l nome deilhas, quales son las mais oulorosas.
Na casa deilhes la mesa stá siempre chena de cousas que sáben
mui bien, gustosas.
-Quando nós ninos fazemos percuras, ls abós nun dízen: “l nino
nun bei que stou acupado”
Eilhes páran, pésan i responden.
-Ls abós sáben un
cachico de todas las cousas.
-Eilhes nun fálan cun nós cumo se fussemos tunticos.
-Quando fálan subre nós nun dízen “ cumo ye d'adbertidico”
cumo faien alguas besitas .
L cuolho de ls abós ye caliente i fofico, buono pa ls ninos
alhá staren quando stan tristes.
La nina inda dixo para
ancerrar la cumbersa:
Toda la giente
debie tener un abó ou ua abó, porque só eilhes ténen tiempo para nós.
Sem comentários:
Enviar um comentário