02/08/12

“Yoga” i tamien “gurus” ouportunistas...


 Fátima, 1917

Afinal fui ne l die 4 de l més atrasado que passou ne l telejornal mais bisto puls franceses ( l “20 heures” de l segundo canal de la telbison pública nesse paíç) un antressante decumentairo que podeis ber bós tamien  AQUI   i que amentaba de maneira clara ne l abuso de poder (psicológico i tamien financeiro) eisercido na Índia por ciertos andibíduos a que se dá alhá l nome de “guru(s)” qualificados assi i todo pul jornalista i comentador de l telejornal francés, lhougo ne l einício de l’apersentaçon de l decumentairo, cumo “falsos gurus”, gatunos mesmo (“escrocs” an francés), pessonas bestidas a la “ghandi”, mui anfluentes inda hoije na bida quotidiana i até política desse paíç, que cunseguírun alguns deilhes amuntonar fortunas colossales tornando-se multimilionairos mas an cundiçones mais que dubidosas, práticas oucultas i doutros tiempos i fugindo eibidentemente al fisco nun de ls países de l mundo adonde cientos de melhones de ls sous habitantes inda cuntínan a bibir na pobreza i ne l subzambuolbimiento an ciertos casos inda crónico i an grande scala. 

Sei que ne l die seguinte, tube oucasion de falar subre esse decumentairo cun dous colegas mius dambos a dous porsores de stória i geografie (an França essas dues diciplinas son siempre ansinadas puls mesmos porsores que ansínan tamien Eiducaçon Cíbica) i pareciu-mos eibidente que essas eimages cumo tamien ls comentairos mos habien a todos trés ampressionado talbeç, mas subretodo antressado, suscitado la nuossa curjidade...  Habie ua relaçon antre ls “gurus” (“guias” cumo splica ua adepta ne l einício de l decumentairo) i tamien essa prática chamada “yoga” que tamien eisiste ne ls nuossos países oucidentales afinal çtinada  a agir tanto a nible de l cuorpo cumo tamien de l cérebro yá que ls “gurus” son tamien “porsores de yoga”...

Ora quien mos ten falado, yá por dues bezes pul menos aqui neste site cumo inda acunteciu ultimamente, subre l yoga an Pertual ten sido Antonho Cangueiro... I cumo el mos dixo que houbo hai poucos dies, an Beja, l “Die Mundial de l Yoga”, a mi passou-me por acaso pula cabeça ir a saber de algo mais an relaçon a todo aqueilho que el mos dixo... Bai un a saber porquei !

Fui anton cumo nun podie deixar de ser al site de la “Confederação Portuguesa de Yoga » que ourganizou l tal ancontro mundial de que mos falou Antonho i an poucos segundos nesse mesmo site qual nun fui la mie stupefaçon de çcubrir, antre outras cousas, alguas linhas que para mi bundórun i son la proba por A mais B que you, por eisemplo, stou a melhones de anhos-luç de aderir un die ou mesmo de dar l mínimo de credibilidade a ua ourganizaçon cumo essa que puls bistos tenta atingir un determinado público... Un público que ganharie na mie oupenion an saber bien mais adonde stá a poner ls pies ! Essa ye la mie cumbicçon.

Las poucas linhas que para mi bastórun para me poner la pulga ne l oubido fúrun estas a perpósito de l “mestre” (i tamien “guru” afinal) Jorge Veiga e Castro de que tamien mos fala Antonho ne l sou testo subre esse Die Mundial de l Yoga ...

FÁTIMA
A outra grande referência de inspiração e Elevação do Mestre Jorge Veiga e Castro é a Manifestação da Kundaliní / Prakrti – Mahá Shakti – a Senhora que se revelou em 1917 em Fátima, e que pregou a urgente paragem do derramamento de sangue entre a Humanidade, a Fraternidade activa, e a Paz Mundial – o seu outro Grande Objectivo Universal.”

Depuis destas linhas, la mie decison quedou tomada. Screbirei un artigo que será eiditado aqui ne l Froles porque ye amportante que haba siempre lhiberdade de spesson mas tamien i nun hai que squecer esso: sprito crítico ! Bastante i até muito sprito crítico de la parte de todos nós tamien afinal !

Cun que anton, essa cunfederaçon torna ou pretende dar outra beç algun balor i legitimidade até - cumo acunteciu bai a fazer quaije cien anhos atrás (Mas quien ye que antre nós yá era bibo nessa altura para poder testemunhar cumo debe de ser?) - a las apariçones que houbo (cumo chegórun a acraditar i inda acradítan alguns inda hoije) an Fátima, an 1917 eisatamiente ??!!

Ancrible! Einacreditable! Un scándalo, na mie oupenion, cumo tamien i mais ua beç ua tentatiba de manipulaçon de la parte de alguns (inda outros desta beç) que nun quieren dar inda hoije la possebilidade de analizar la realidade (i nó ounicamente suonhos i quimeras !) cun pragmatismo i tamien l mássimo de oubjetibidade!  

Nun solo you haberie de dezir esto, tamien ls mius dous colegas franceses antre todos ls outros de ls mius colegas i que todos ls anhos analízan (mas oubregatoriamente de maneira oubjetiba i nó partidária) i lhieban ls alunos de l último anho de l liceu an particular a refletir, porque faç parte de ls programas oufeciales,  subre la situaçon atual dun paíç tan grande i tan poboado cumo la Índia...

La  Índia... !

cumo talbeç tamien Pertual quien sabe afinal anque mais pequeinho i bien menos poboado ??!!

N.B. Ye berdade ! Aqui pouco se falou inda subre las apariçones de Fátima ! Un die destes ten que APARCER assi i todo l’ouportunidade ou mesmo l’oucasion de l fazer !  MILAGRE ! Bonda carregar an alguns botonicos i fazer trabalhar ls neurónios, cun que anton !

6 comentários:

Tortulhas disse...

Buonas nuites, Ana,

Apuis de ler l buosso scrito, oubjetibamiente, oubjetibamiente, solo se me dá dezir que l çprézio i la falta de respeito qu'amostrais pulas crenças i pulas maneiras de ber de ls outros (melhones de pessonas) ye ua cousa que anté fai arrepiçar ls pelos!...

Heis de le procurar als buossos amigos porsores se l porgrama d'Eiducaçon Cíbica nun diç nada subre "multiculturalismo" i subre respeito pulas oupeniones de ls outros!
Abraços

Ana disse...

Lhiberdade si... Sprito crítico tamien!

Yá todo staba dito.

Ana disse...

Lhiberdade si... Sprito crítico tamien!

Yá todo staba dito.

Almendra disse...

Buonos dies, Ana,

Cada un ye lhibre de pensar e acraditar ne l que quier!

Tamien nun hai probas que nun ye berdade que Nuossa Senhora apareciu, agora que hai teçtemunhos de ls milagres hai. Nunca se sabe se nun acabarás por te zbarrar cun algua proba bien eibidente!
Pensa, pensa por ti i deixa essa giente de las ounibersidades i ls porsores deste mundo, porque l que quíeren ye ser diuses eilhes tamien!

Yá Camões dezie:
...
Este altara a las bezes las ciéncias,
Ls juízos cegando i las cuncéncias...
...

Fago mies las palabras de Tortulhas!

Apuis de ler l buosso scrito, oubjetibamiente, oubjetibamiente, solo se me dá dezir que l çprézio i la falta de respeito qu'amostrais pulas crenças i pulas maneiras de ber de ls outros (melhones de pessonas) ye ua cousa que anté fai arrepiçar ls pelos!...

Heis de le procurar als buossos amigos porsores se l porgrama d'Eiducaçon Cíbica nun diç nada subre "multiculturalismo" i subre respeito pulas oupeniones de ls outros!
Abraços

Ana disse...

Subre «multiculturalismo», neste momemto i yá zde muitos anhos, la França nun queda atrás de Pertual antes pul cuntrairo cumo debeis de saber.

Quanto a las tales apariçones de Fátima, dai-me mas ye l'orpotunidade de rir un pouco...

porque, claro!, cumo yá bos destes de cuonta, nun acradito nessa fantuchada toda nien sequiera un segundo. Só se un quejir star a perder tiempo... nestas tierras lusitanas tan relegiosas.

Abraço para ls dous

Ana disse...

l'ouportunidade