L trobisco i la sfuira

L trobisco cumo to l mundo sabe ye un pequeinho arbusto que nace i se cria pul termo, adonde haba touças, balhes, terreno sien cultivo, an muntonicos sendo mui amargoso i quando l agarramos culas manos ten malo oulor, bota pula purmabera alguas floricas brancas i apuis uas cereijicas burmeilhas de semiente La trobisqueira puode tener solo ua fróncia ou un manhuço deilhas.

Sfruira ou cagalera (dearreia) ye l stado que muitos cordeiricos neste tiempo i na purmabera ténen.

Que se nun fur trabada, puode lhebar l animal a smirrar cula maleita i anté muorrir-se

I cumo stan eilhes lhigado, que ten ua cousa haber cula outra?

Quando fui garoto, habie an mie casa ganado, quando l ganado ampeçaba a quemer muita yerba, yerba berde, ls cordeiricos quedában sfuirados.

Mas cumo tamien to l mundo sabe ls pastores tenien muito saber daprendido, daprendido culs mais bielhos, ansinamientos ourales de ls sous antepassados. Que mobidos desse saber i fé ponien an prática.

Assi quando un cordeirico quedaba cun sfuira, íba-se a un trobisco dua sola fróncia i tiraba-se la casca (puis çfila-se cumo se fússen filos) i ataba-se al rabo de l cordeirico sfuirado.

Apuis dun die ou dous la sfuira paraba i l animal quedaba bien.

L trobisco i la sfuira andában de manos dadas (neste causo de rabo anfeitado) cua pouca de fé a la mistura, hoije nun sei, cumo yá se perdiu muito ansinamiento se calha yá hai muitos remédios de ls lhaboratórios.

Nesse tiempo (anhos 50, 60 de l seclo datrás) l grande lhaboratório de las gientes de l praino mirandés era la sbedorie popular culas upas de la natureza.