Crónica – Ser cumpleto (anteiro)

Quando you naci i me criei, ne ls anhos cinquenta sessenta de l seclo datrás, la bida nun era fácele, mas de l que querie screbir hoije, nun ten haber cula pobreza, nien lhamuriar-me na falta de cousas nien de l que habie nun star bien çtribuido.

Quiero screbir d’algue que hoije falta muito, ou seia, yá pouco se bei. Las rezones serán muitas, mas nun ténen haber cun riqueza nien pobreza, l mal stá n’eiducaçon, na falta de carátele, na cultura ou falta deilha.

Quien nun se lhembra d’oubir dezir – esse tiu ye mui cumpleto.

Home ou mulhier, pessona cumpleta (anteira) ye ser hounesta, de palabra que tenie ua sola palabra, pula berdade i só la berdade, fusse adonde fusse, delantre ou nas cuosta, d’amigo ou d’einemigo, anté mesmo s’el própio quedasse an causa, pessona qu’era querida i scolhido para dar cunseilhos, tomar palabra an partilhas, dar la sue palabra an questones de negócios, oupeniones de abaliaçones, zampatar i por ende afuora.

An pertúes esse nome ye bien conhecido, diç-se “íntegro – homem, mulher, pessoa”. Que you an mirandés digo cumpleto, (anteiro).

Tamien este termo de anteiro era muito ousado, quando las pessonas se referien a un animal que nun habie sido capado, que podie fazer cubriçon, qu'inda ls tenie. Puode nun haber muitas asparcéncias, mas quando falamos d’homes, tamien se diç de quien ye sério, de palabra, el ten-los ne l lugar.

 De quien ye troca tintas, de quien queda dá bien por anteresse, de quien diç ua cousa i apuis fai outra, de quien solo fai las cousa se deilhas tirar porbeito, nun ten colhones.
Nun ye de fiar.

Ls homes, las mulhieres, las pessonas cumpletas (íntegros) siempre tubírun i teneran la mie admiraçon, aquelhes i aqueilhas que nun l son solo me dan duolo, pena.