Teçtemunhos culturales

Dei este títalo a esta mie pequeinha crónica, mas puodie lhebar uma semba deilhes, cumo “ua manhana stórica”, “eibento cumo dantes nunca bisto”, “manhana cultura na secuola secundaira Eças de Queirós-Olivais” … i por ende alantre, puis todos quedarien bien. 

Porque fui todo esso i muito mais l que se fizo a la purmanhana de l die 25 de Nobembre na scuola secundaira Eça de Queirós-Olivais.

Mas “teçtemunhos culturales” porque l eibento ampeçou cun quelóquio (peça de teatro) adonde la sue temática, mote, fui “L Filico i l Nobielho” ,  lhibro screbido hai uns anhos datrás, d’outorie de l porsor, scritor, ambestigador, mestre, Fracisco Niebro/Amadeu Ferreira cula eilustraçon de Sara Cangueiro i ancerrou cula einauguraçon dun spácio de lheitura na biblioteca de la scuola, cul nome de “Lhuzie” an houmenaige a la filha de Jesé Pedro, nieta de l outor. 

La quemunidade scolar aporbeitando la comemoraçon de l die de la scuola, lhigado al sou patrono Eça de Queirós, antendiu por bien birar ua buona parte de las atebidades culturales i recreatibas para la área de la cultura i lhéngua mirandesa. I fui ne l ouditório percipal, cheno de studantes, porsores, cumbidados que tubo l purmeiro punto alto. Quando la classe de l 10º anho d’artes i spetáclos, rumpiu d’atrás de ls tapones, cun bigor, antrega, balor, dedicaçon, eibocando la narrativa de l testo, an mirandés cumo s’amponie. Sien miedo, cun eilegáncia i eiceléncia, de guapa i eicelente ancenaçon deixórun ne ls oubidos i uolhos de to l mundo la magie de se fazer quelóquio. Atores cun géstios i palavras que naquel momiento atórun l filico de l sentimento dua assemblé que quier saber, puis la maiorie éran jobes, i quien ama la cultura. La gana de passar la mensaige era fuorte, la sue gana de eilebar estes balores tamien nun era mais pequeinha. I se l que queda para siempre son las obras i l que se puode fazer cun eilhas, anton esta classe fize-lo, este quelóquio eimortalizou. L’assemblé quedou rendida, e cuido que marcou para siempre este ouditório, cun este quelóquio an mirandés quedou claro, nesta scuola las dues lhénguas stan a la par.

 Çpuis fui tiempo para anterbençones de sclarecimiento, motibaçon e dibulgaçon, feitas puls familiares (Jesé i João) filhos de l mestre Amadeu Ferreira de la cultura e lhéngua mirandesa, tamien por Antonho Cangueiro subre l testo, de música i de l’amportáncia que ténen estes eibentos culturales andrento de la quemunidade scolar, puls repunsables de la scuola i de quien tubo l’einiciatiba, assi cumo de la persidente de l’outarquie.

L segundo punto alto fui na biblioteca de la scuola, delantre de l “spácio Lhuzie”. Quando las repunsables de la scuola e deste spácio de lheitura amostrórun la mensaige grabada/filmada de la Drª Manuela Barros Ferreira dedicada a la lhéngua mirandesa, l porsor Fernando Pinto, home que abraçou zde hai muito tiempo este patrimonho, çtacou l’amportáncia de poner estes marcos na bida de jobes que ténen un feturo para bibir. L’amportáncia que ten an tener este nome i quanto puode baler pa ls dies de manhana, cumo lhigaçon a la mimória de l grande home que fui sou avó.

Stan de parabienes la classe de studantes que fazo l quelóquio, ls motibadores e purparadores que agarrórun l’eideia deste spetáculo, la direcion de la scuola, la repunsable de la biblioteca pul ampeinho an çponiblizar e reserbar un spácio cun lhibros de lheitura i decumientos an mirandés, stá de parabienes toda la quemunidade scolar de la scuola Eça de Queirós.

 Stá de parabienes la cultura.

Bien háiades todos, todos aqueilhes que dórun l sou melhor para que fusse possible bibir este die tan rico, todos aqueilhes que se çponibízan a recebir i acarinar estes aires culturales.

La cultura cumo quemido i sustento dua sociadade ten que fazer parte de l die a die de todos nós.