15/11/15

Hai siempre alguien que diç... NON !


La França stá outra beç de lhuito. Morrui muita giente i muitos na frol de l'eidade, mais de cien na hora an que scribo. Dous dies depuis de ls atentados de que fui albo la capital francesa, muitas outras bítimas einocentes inda stan antre la bida i la muorte cul cuorpo traspassado por balas de metralhadoras assassinas... Todo esso por bies de l fanatismo de alguns que nun acéitan que la França anterbenga militarmente (sendo eilha, de momento, un de ls raros países a fazé-lo) an zonas de l mundo cumo África i l Médio Ouriente porque quieren esses fanáticos, an nome de Alá cumo eilhes dízen, ser ls únicos a mandar alhá cumo le dá la gana: subretodo para ganhar denheiro cula benda i la sploraçon de petróleo, sembrando, para chegar a esse fin, l terror i l pánico.

Mas yá naide puode squecer todas las luzicas que fúrun acendidas, onte a la nuite, i alumeórun la státua que representa la República, ne l coraçon de Paris, a dous passos de ls sítios adonde fúrun cometidos ls atentados ... I todos, mais ua beç, ancuntramos fuorça i sprança, lhembrando cumo fázen ls poetas :

Mesmo na nuite mais triste
an tiempo de serbidon
hai siempre alguien que resiste
hai siempre alguien que diç... NON !



Sem comentários: