21/02/15


L Bolo de la Cotobia

 

Se bires ua cotobia perdida ne l spácio,

 zeinha-le un traço, stende-le un filo d'ourora

 adonde puoda amar la claridade de l tiempo einicial

 l tiempo de ls abraços de l sol nas scarpas

 l spanto de l mundo çpindurado ne l penhasco

 i de l canto sgalhado nas arribas de l'apertado bal.

 

 Yá nun se reconhece nas alas an q'acraditaba,

 mas sabe que bubia la melodie eimaculada de las cascatas anfurecidas

 de las ourbalheiras de la nuite, de l grito xordo de las fuolhas perdidas

 Sabe que percebia l resfuolgo de la tierra caliente i molhada.

 Fizo-se camino de riu, retombo de bordas a pulsar paixon,

 peligro, queda, lhonjura, grácia sfumada, queda rasa d'alma.

 

Morou siempre lhoinge, rente al penhasco, para alhá de l'eimaginaçon.

 La cotobia que tenie agarrado na arena mobediça l splendor

 fechou l ciclo. Fizo-se regresso, primórdio. Sabie que bolaba.

Sbolaçar ye l sou çtino. Siempre lhoinge de la claridade de l nial

 cuntina a rasgar alas, perseguindo hourizontes ampossibles

 

Se bires ua cotobia perdida ne l spácio,

 zeinha-le un traço, stende-le un filo d'ourora.
 
Teresa Almeida Subtil
 
(Testo salido na Fuolha Mirandesa de l Jornal Nordeste - 03/02/2015) 

 

2 comentários:

Francisco Santos disse...

Gostei. Parabéns!

Teresa Almeida disse...

Oubrigada, Francisco Santos.
Abraço.